Այսօր Գեղարքունիքի մարզի Սեւանի նստավայրում Ազատ գյուղի զինվորական կացարանում բռնկված հրդեհի ու դրա հետեւանքով 15 զինվորի մահվան դեպքի քննության գործով դատական նիստում հարցաքննվեց զորամասի նյութական ապահովման վաշտի հրամանատար Արամ Ջամալյանը:
Նրա պատմելով՝ ինքը կացարանի հրդեհի մասին տեղեկացել է գիշերը, անմիջապես անձնակազմին է իրազեկել. «Քանի որ իմ գործը տրանսպորտային միջոցների հետ է կապված, զանգել եմ վարորդներին, որ զգոն լինեն, որ ըստ անհրաժեշտության՝ խնդիրներ կատարեն:
Դեպքի վայր գնացել եմ լուսադեմին: Հրդեհն արդեն մարվել էր, դեպքի վայրում բավականին շատ մարդ կար, դիակների դուրսբերման ականատես չեմ եղել: Այդ աշխատանքներն արդեն ավարտված էին»:
Կարդացեք նաև
Դեպքից հետո տարբեր ստորաբաժանումներին հակահրդեհային միջոցներ բաժանելու գործընթացին իր ենթակաները մասնակցե՞լ են հարցին, վկան պատասխանեց ինքը նման ցուցում չի տվել, տեղյակ չէ :
Մինչեւ Մառլեն Սարգսյանի՝ ԳՇ պետի պաշտոնում նշանակվելը եղե՞լ է, որ նրան նախորդող պետը՝ Խաչատրյանը, հակահրդեհային անվտանգության դասընթացներ անցկացնի հարցին, վկան կրկին պատասխանեց՝ չի հիշում: Այսպես վկան մի շարք հարցերի պատասխանեց՝ չի հիշում, ինչից հետո նրա վատ հիշողության մասին ակնարկներ եղան դատավարական կողմերից:
-Պատերազմի հետեւանքները ձեր հիշողության ո՞ր իրադարձությունների վրա կարող էր ազդած լինել,-հետաքրքրվեց տուժողների ներկայացուցիչ Նորիկ Նորիկյանը՝ արձագանքելով վկայի հայտնած տեղեկությանը, թե պատերազմը ազդեցություն է թողել իր վրա:
-Բաներ կան, որոնք մոռանում եմ, հետո հիշում,- արդարացավ վկան:
Ո՞ւմ հետ է գնացել դեպքի վայր՝ հարցին վկան պատասխանեց՝ չի հիշում, բայց հիշեց՝ քաղաքացիական մեքենայով է գնացել Վարդենիսից, ոչ թե ինչ-որ մեկի հրահանգով, այլ իր ցանկությամբ է գնացել:
Այս վկան նախաքննական ցուցմունքում հայտնել էր, որ անձամբ մասնակցել է դիերի դուրսբերմանը:
-Մեկ դի էլ հանել եմ քանդված պատի դիմացի անկյունի հատվածից գետնի վրա, դրանից հետո դուրս եմ եկել սթափվելու,- վկայի նախաքննական ցուցմունքից մեջբերեց փաստաբան Նորիկյանը:
-Նկատի եմ ունեցել՝ օգնել եմ հանել են, անձամբ դի չեմ հանել,- արդարացավ վկան:
-Գրած չէ, որ օգնել ես, -նկատեց Նորիկյանը:
Այդ պահից վկայի հիշողությունը մասամբ վերականգնվեց:
-Չեմ սպասել, որ մեկն ասի՝ գնա այդ «լապատկեն» վերցրու, քանդի, ասենք՝ ԱԻՆ-ի ժողովուրդը տանում էր դիակները, ես էլ կողքից օգնել եմ , պատգարակն եմ բռնել,- վերհիշեց վկան:
Ծնողները արձագանքեցին՝ լավ էլ հիշեցիր, հա…:
Մինչ այդ վկան պնդում էր՝ ոչ միայն ինքը, այլեւ նույնիսկ իրենց անձնակազմից որեւէ մեկը չի մասնակցել զոհված զինվորների դիերի դուրսբերման աշխատանքներին:
-Ո՞նց կարող էիք այրված զինվորներին տեսած լինեիք ու նրանցից մեկին էլ դուք հանած լինեիք ու չհիշեիք,- զարմացավ Նորիկյանը:
Վկան նախաքննական ցուցմունքում նաեւ հայտնել էր, որ դիերի դուրսբերման աշխատանքների ժամանակ եւս երեք զինվորի փաթաթված վիճակում է նկատել: Ասաց՝ բոլորն էլ դեպքի վայրում տեսել են այդ դիերը: Նորիկյանը դատարանում խնդրեց նկարագրել, ոնց են իրար փաթաթված եղել այդ դիերը՝ մահճակալին պառկած, նստած, կիսանստած:
«Դե փաթաթված նկատի ունեի, որ իրար կողքի են եղել»,- ասաց վկան:
Արփինե ՍԻՄՈՆՅԱՆ
