Առիթ եղել է ասելու, որ շուրջ երկու տարի համագործակցում են «Գուրգեն Մելիքյանի՝ Քաշաթաղի բազմազավակ ընտանիքների հիմնադրամ»-ը (ԳՄՔԲԸՀ) և Կանադայի «Գլոբալ-Մեդիկ» («Global-Medic») մարդասիրական կազմակերպությունը։ Օրեր առաջ Երևան էին ժամանել կանադական այդ կառույցի ներկայացուցիչներ Ստեփան Մյուլերը և Մարի Չուկրան, ովքեր Հիմնադրամի գործադիր տնօրեն Գուրգեն Մելիքյանի և հոգաբարձության խորհրդի անդամների հետ սննդի օգնություն տրամադրեցին Արցախից բռնի տեղահանված բազմազավակ ընտանիքներին։
Հիմնադրամը, ինչպես հայտնի է, երկար տարիներ աջակցություն էր ցուցաբերում Արցախի տարբեր բնակավայրերում ապրած բազմազավակ և սոցիալապես անապահով ընտանիքներին։ Արդեն երկրորդ տարին է՝ շարունակում է նրանց աջակցել ՀՀ տարբեր մարզերում և Երևանում, որտեղ վերաբնակվել են նրանք իրենց պատմական բնօրրանից բռնի տեղահանվելուց հետո։ «Գլոբալ-Մեդիկ» կազմակերպության հիշյալ կամավորները մայիսի վերջին ԵՊՀ արևելագիտության ֆակուլտետի մասնաշենքում, որը ԳՄՔԲԸՀ-ի գործատեղին է, հոգաբարձուների հետ միասին մասնակցեցին մոտ 20 շահառու ընտանիքներին սննդով աջակցելուն, այնուհետև այցելեցին Հայաստանի տարբեր վայրերում բնակվող արցախցիներին։ ԳՄՔԲԸՀ-ի գործադիր տնօրեն, ԵՊՀ արևելագիտության ֆակուլտետի նախկին դեկան, պրոֆեսոր Գուրգեն Մելիքյանը, հոգաբարձուների խորհրդի նախագահ, ԵՊՀ հայ բանասիրության ֆակուլտետի նախկին դեկան, պրոֆեսոր Արծրուն Ավագյանը և հոգաբարձուների խորհրդի անդամ, ԵՊՀ աշխարհագրության և երկրաբանության ֆակուլտետի նախկին դեկան, պրոֆեսոր Մարատ Գրիգորյանը կանադացի հյուրերի հետ միասին օրերս այցելեցին արդեն հայաստանաբնակ շահառուներին։
Կարդացեք նաև
Առաջին ուղևորությունը կայացավ ՀՀ Կոտայքի մարզի Ձորաղբյուր գյուղ, ուր այժմ բնակվում են Արմեն և Արմինե Բադալյանները։ Նրանց ընտանիքը վեց երեխա ունի։ Բռնագաղթվել է Քաշաթաղի շրջանի Իշխանաձոր գյուղից այժմ վարձով բնակվում է Ձորաղբյուրում։ ՀՀ-ում բռնագաղթվածներից առաջինն է, որ հիմնադրամի կողմից ստացել է կով։ Այցելության հաջորդ նշանակետը Նոր Խարբերդն էր, որտեղ իր երեք երեխաների հետ վերաբնակվել է Արցախի Մարտունու շրջանի Մաճկալաշենի բնակիչ Նուբար Դանիելյանը։ Նրա ամուսինը հերոսաբար զոհվել է 2023 թ․ սեպտեմբերի 23-ին հայրենի գյուղը պաշտպանելիս։ 2020թ․ պատերազմում էլ նահատակվել էին Նուբարի եղբայրները։ Համագործակից բարերարների մյուս նպատակակետը Արմավիրի մարզի Էջմիածնի տարածաշրջանի Շահումյան գյուղն էր, ուր բնակվում է Քրիստինե Ամյանի ընտանիքը՝ 12 երեխաներով։ Բարերարները նրանց ևս հատկացրին նախատեսված աջակցությունը։ Օրվա ընթացքում հյուրերը Հիմնադրամի գործադիր տնօրենի և հոգաբարձուների խորհրդի անդամների ուղեկցությամբ այցելեցին Մայր աթոռ Սբ․ Էջմիածին և Զվարթնոցի տաճար, ծանոթացան Հայոց եկեղեցու պատմությանը, վաղ միջնադարյան եկեղեցաշինական ճարտարապետությանը։
Զոհրաբ ԸՌՔՈՅԱՆ
