Երեւանի ավագանու «Ազգային առաջընթաց» խմբակցության անդամ Հայկ Գրիգորյանը լրագրողների հետ ճեպազրույցում անդրադարձավ հարցին, որ ավագանին մերժեց իր նախագիծը, որով առաջարկում էր դադարեցնել ավագանու «Հանրային ձայն» խմբակցության անդամ Արտակ Գալստյանի լիազորությունները։ Հայկ Գրիգորյանն ասաց, որ «Հանրային ձայն» խմբակցությունն ունի «Քաղաքացիական պայմանագրի» լիակատար» աջակցությունը։
«Ընդդիմադիրները վկայակոչում են բարոյական նորմերը, որ Արտակ Գալստյանը տնային կալանքի տակ է։ Բայց ի՞նչ բարոյականության մասին է խոսքը, եթե երեւանցին ձայն է տվել ընդդիմությանը, բայց նույն ընդդիմությունը, ինչ-որ բարոյական նորմեր վկայակոչելով, չի ուզում բնակիչների ձայնին տեր կանգնել։ Ընդդիմության մեջ կա տարբեր մոտեցում ժողովրդին տված քվեների մասով։ Ես բերել եմ նախագիծ, որով ասում եմ՝ մանդատից զրկենք, մարդիկ ասում են՝ մեզ պետք չէ մանդատից զրկել, որովհետեւ բարոյական չէ, մարդը տնային կալանքի մեջ է։ Խնդիրն այն է, որ ես չեմ տեսնում ընդդիմության մեջ միասնական դիրքորոշում, որ իրենք ուզում են Երեւանի քաղաքապետարանում ընդդիմությանը տված քաղաքացու ձայներին տեր կանգնել»,- ասաց նա։
Հայկ Գրիգորյանի խոսքով՝ նորմալ չէ, երբ ընդդիմությունը չի ուզում իշխանությանը տապալելու ու հաղթելու իրավական ճանապարհից օգտվել։ Նա նշեց, որ եւ «Մայր Հայաստանը», եւ «Ազգային առաջընթացի» «մարությանական թեւը» դեմ են արտահայտվել, որ Արտակ Գալստյանը մանդատից զրկվի։
«Մարդիկ թող իմանան, որ էս պահի դրությամբ Երեւանի քաղաքապետարանում կա 24 հատ ընդդիմադիր, այսինքն՝ Հանրային ձայնն ամբողջությամբ կորսված է։ Եվ այդ 24 հոգին էլ չունեն միասնական դիրքորոշում, թե ոնց 7 ձայնը հետ բերեն ու դառնան մեծամասնություն։ Եվ թող ընդդիմությունը այդ 24 հոգի ձայն ունենալու հաշվով էլ կառուցի իր գործողությունները, ոչ թե վեր-վեր թռնի, եթե որեւէ գործողություն չի անելու ժողովրդի տված 33 ընդդիմադիր ձայնին տեր կանգնելու համար»,- հավելեց նա։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
