Լրահոս
Օրվա լրահոսը

Բացվել եւ վերաօծվել է Ակունք գյուղի Սուրբ Մեսրոպ եկեղեցին

Հունիս 24,2025 15:43

Գեղարքունիքի մարզի Վարդենիս համայնքի Ակունք գյուղում, ձեռամբ Հայ Առաքելական եկեղեցու Գեղարքունյաց թեմի առաջնորդ Տեր Պարթև եպիսկոպոս Բարսեղյանի եւ աղոթակցությամբ թեմի հոգեւոր դասի, վերաօծվեց եւ բացվեց Սուրբ Մեսրոպ եկեղեցին։


Եկեղեցու վերաօծման եւ բացման արարողությանը մասնակցեցին Գեղարքունիքի մարզպետ Կարեն Սարգսյանը, ՀՀ ԶՈՒ բանակային երկրորդ կորպուսի հրամանատար Գարեգին Պողոսյանը, Վարդենիս համայնքի ղեկավար Ահարոն Խաչատրյանը, Գեղարքունիքի մարզպետի տեղակալ Վահան Զարոյանը, Գեղարքունիքի մարզպետի եւ Վարդենիսի համայնքապետարանի աշխատակազմի ներկայացուցիչներ, Վարդենիս համայնքի բնակավայրերի վարչական ղեկավարներ, պաշտոնական այլ անձինք, Ակունքի և հարակից բնակավայրերի բնակիչներ։

Վերաօծման արարողությունից հետո ակունքցիներին ողջույնի ու շնորհավորանքի խոսքեր հղեցին Գեղարքունյաց թեմի առաջնորդ Տեր Պարթև եպիսկոպաս Բարսեղյանը, Գեղարքունիքի մարզպետ Կարեն Սարգսյանը, Վարդենիս համայնքի ղեկավար Ահարոն Խաչատրյանը` միաժամանակ իրենց երախտագիտությունը հայտնելով եկեղեցու վերակառուցման ու վերականգնման հովանավոր ակունքցիներին։

Ակունքի Սուրբ Մեսրոպ եկեղեցին կառուցվել է 15-17-րդ դարերի ընթացքում, գործել է մինչեւ 1930-ական թվականները։ Խորհրդային տարիներին այն վերածվել է կոլխոզի պահեստի, ապա ժամանակի ընթացքում դարձել լքված շինություն։
Շուրջ ինը տասնամյակ անց, շնորհիվ Ակունքի վարչական ղեկավար Նիկոլա Խաչատրյանի, համայնքի նախկին ղեկավար Արծրուն Ղարիբյանի կազմակերպչական ջանքերի, Արթուր եւ Արա Թադևոսյան եղբայրների, մյուս ակունքցիների ներդրած միջոցների, կրկին ղողանջեցին նորակառույց զանգակատան զանգերը։ Կատարվեց նաև կնունքի եւ մատաղի արարողություն։

Հոգևոր երգերի կատարմամբ հանդես եկան Վարդենիսի Սուրբ Աստվածածին եկեղեցու երգչախմբի սաները։
Գեղարքունաց թեմի առաջնորդի հավաստմամբ՝ Ակունքի Սուրբ Մեսրոպ վերաօծված եկեղեցին դարձավ 35-րդ հավատի տունը, որը Հայաստանի Հանրապետության անկախացումից ի վեր Գեղարքունյաց թեմում հավատավորների առջև բացեց իր դռները։

Գեղարքունիքի մարզպետի աշխատակազմ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հունիս 2025
Երկ Երե Չոր Հնգ Ուրբ Շաբ Կիր
« Մայիս   Հուլ »
 1
2345678
9101112131415
16171819202122
23242526272829
30