«Հանուն Հանրապետության» կուսակցության փոխնախագահ Ռուբեն Մեհրաբյանը ԱԳՆ-ի առջեւ հրավիրված բացօթյա մամուլի ասուլիսում հայտարարեց, որ ասուլիսի առիթը Եվրոպական հանձնաժողովի փոխնախագահ, ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Կայա Կալասի այցն է Երեւան:
«Սա մի նոր քայլ էր Հայաստան-Եվրամիություն հարաբերությունների առաջընթացում: Սակայն մենք այստեղ ունենք շատ որոշակի նկատառումներ այն իմաստով, որ Հայաստանը տնային աշխատանքում հստակեցումների կարիք ունի, ինչի հետ կապված մեր կուսակցությունը հայտարարություն է ընդունել: Իսկ թե մանրամասները ինչ ենք մենք պատկերացնում, ինչ անելիքներ ունի Հայաստանը ներսում, իսկ դրանք շատ-շատ են, դրանց մասին կմանրամասնի Արման Բաբաջանյանը»,-ասաց նա ու մինչեւ խոսքը կփոխանցեր իր առաջնորդին, կոշտ բառապաշարով արտահայտվեց Հայաստանում Ռուսաստանի ներկայության մասին՝ նշելով, որ իրենց կուսակցության պատկերացմամբ առանց այդ հարցը լուծելու հնարավոր չէ առաջընթացի մասին խոսել:
Ռուբեն Մեհրաբյանի գնահատականով Հայաստանի իշխանության կիսաքայլերը հիբրիդային հարձակումների թիրախի են վերածվում: «Հենց այսօր էլ Ռուսաստանի արտգործնախարարը միջամտել է մեր ներքին գործերին, ինչի հետ կապված մեր արտաքին գործերի նախարարը դա այդպես էլ կոչեց: Բայց այստեղ ժամանակն է, որ բացի կոչերից, նաեւ արդեն շատ կոնկրետ քայլեր լինեն այս ուղղությամբ, եւ Ռուսաստանը մեկ ընդ միշտ մեկ կողմանի տոմսով այստեղից ուղղակի դուրս գա»,- եզրակացրեց Մեհրաբյանը:
Կարդացեք նաև
Կուսակցության նախագահ Արման Բաբաջանյանը ասաց. «Այսօրվա այս հրատապ ասուլիսը մի կարեւոր նկատառում է դիտարկել: Այն, որ մենք, փաստորեն, ընդամենը վերջերս ենք ընդունել Եվրամիության անդամակցության գործընթացի մեկնարկի մասին օրենքը: Դրանից հետո պետք է գործուն քայլեր ձեռնարկվեին Հայաստանի՝ Եվրոպական անդամակցության ուղղությամբ:
Հայաստանի կառավարության ղեկավարը հայտարարեց, որ դրանից հետո պետք է Եվրամիության պաշտոնյաների հետ հստակ ռազմավարություն եւ գործողությունների ճանապարհային քարտեզ մշակվի: Մենք ակնկալում էինք, որ կառավարության կազմից առնվազն մի քանի պատասխանատու գերատեսչությունների ղեկավարներ կնշանակվեն որպես բանակցության հայկական կողմ, եւ մենք անհապաղ կսկսենք ասոցացման գործընթացի շուրջ բանակցություններ:
Հասկանում ենք, որ այս բանակցությունները կնշանակեին նաեւ Հայաստանի Եվրասիական տնտեսական միության անդամակցության գործընթացի դադարեցում, ինչի վերաբերյալ նախորդ շաբաթ եւս զգուշացումներ եղան Հայաստանից, որ Հայաստանը չի կարող միաժամանակ երկու կառույցներում լինել, ինչի հետ չենք կարող չհամաձայնել: Հայաստանն էլ այս ուղղությամբ առարկայական քայլեր չի կատարում: Եվ սա մեզ շատ անհանգստացնում է, որովհետեւ 60 հազար քաղաքացիների ստորագրությամբ, նաեւ մեր կուսակցության կողմից գործադրված ջանքերի արդյունքում մենք տեսել ենք մեր հանրության իրական տրամադրությունները:
Եվ իշխանությունները, ըստ էության, այդ օրենքի ընդունմամբ համարում են, որ իրենք վերջացրել են այդ գործընթացը եւ որեւէ քայլ չունեն անելու: Սրա հետ մենք չենք կարող հաշտ լինել: Մենք պահանջում ենք գործնական քայլեր, մենք պահանջում ենք հստակ քաղաքականություն եւ ճանապարհային քարտեզ՝ որտեղից պիտի Հայաստանը սկսի, ինչ քայլեր պիտի ձեռնարկվեն Հայաստանի՝ Եվրոպական Միության անդամակցության երկար, բայց շատ կարեւոր գործընթացը անհապաղ մեկնարկելու համար»:
Աշոտ ՀԱԿՈԲՅԱՆ
