«Երևի իրենց դեգեներատ հաղորդավարների ծրագրերն են նայել և նման տպավորություն ստացել, որ հարվածում է հայ-ռուսական հարաբերություններին։ Թող ռադները քաշեն, վեր ընկնեն, իրենց գործերով զբաղվեն և մեր երկրի ներքին գործերին չխառնվեն»,-լրագրողների հիշեցմանը՝ կան ռուս պատգամավորներ, որոնք հայտարարել են, որ ՀՀ-ում ձերբակալությունները հարվածում են հայ-ռուսական բարեկամական հարաբերություններին, լրագրողների հետ ճեպազրույցում այսպես արձագանքեց ՀՀ ԱԺ նախագահ Ալեն Սիմոնյանը։
Ալեն Սիմոնյանը վստահեցրեց՝ իր գործընկեր Վալենտինա Մատվիենկոն հրաշալի այց է ունեցել Հայաստան։
ԱԺ նախագահի կարծիքով՝ ռուսական հեռուստաալիքների հեռարձակման դադարեցման հարց պետք է քննարկել․ «Թող բերանները փակեն, ռադները քաշեն։ Համարում եմ, որ մենք շատ լրջորեն այս ամենից հետևություն պետք է անենք և քննարկենք ռուսական հեռուստաալիքների հեռարձակումը դադարեցնելու հարցը ՀՀ-ում։ Եթե ռուսական պետական ալիքները թույլ են տալիս իրենց խառնվել ՀՀ ներքին գործերին, միգուցե մենք էլ առնվազն պետք է փակենք իրենց մուտքը մեր հանրության բնակարաններ»։
Կարդացեք նաև
Լրագրողները հիշեցրին՝ ՌԴ ԱԳ նախարար Սերգեյ Լավրովն էլ է հայտարարել, որ Հայ առաքելական եկեղեցու վրա հարձակումները մտահոգություններ են առաջացնում, Ալեն Սիմոնյանն ասաց, որ չի արձագանքի, քանի որ նրան արդեն պատասխանել են։
Տաթև ՀԱՐՈՒԹՅՈՒՆՅԱՆ
