Հունիսի 27-ին, երբ ԱԱԾ ծառայողները գործողություններ էին սկսել Սուրբ Էջմիածնում՝ Վեհարանի դիմաց, եւ փորձում էին բիրտ ուժով այնտեղից քննչական մարմին տանել Միքայել սրբազանին, մի շարք քաղաքացիներ հավաքվել էին այնտեղ իրենց աջակցությունը հայտնելու Ամենայն հայոց կաթողիկոսին եւ Միքայել սրբազանին:
Այս աջակցության քողի տակ մի ուշագրավ դրվագ բաց թողնվեց հանրության ուշադրությունից: Հավատացյալների շարքերում երեք կանայք կանգնել էին Վեհարանի դարպասների դիմաց, ձեռքը դրել փականին եւ թույլ չէին տալիս Միքայել սրբազանին դուրս գալ Վեհարանի դարպասներից: Նրանք նույնիսկ չանսացին Ամենայն հայոց կաթողիկոսի կոչին՝ բացել դարպասը:
«Վեհափառ, մենք մեր սրբազանին չենք թողնելու, ո՛չ, ո՛չ: Ես Պարսկաստանում հայ եմ մնացել եկեղեցու շնորհիվ, ես թույլ չեմ տա ՝ այս պիղծ հայերը կոտորեն իմ եկեղեցին, իմ սրբազանին: Խնդրում եմ»,- լացակումած այսպես էին արձագանքում կանայք Վեհափառի՝ դարպասը բացելու խնդրանքին:
Կարդացեք նաև
Մեր տեղեկություններով՝ կանանցից մեկը իշխանական հայացքներով հայտնի քաղաքագետ Հարություն Մկրտչյանի կնոջ մայրն է: Նա հաստատեց այդ տեղեկությունը:
Քաղաքագետին խնդրեցինք մեկնաբանել զոքանչի գործողությունները՝ հետաքրքրվելով արդյոք սադրիչ քայլ չէր նրա զոքանչի կողմից արվածը՝ հաշվի առնելով, որ ակնհայտ է՝ ինչ կլիներ, եթե սրբազանը չներկայանար քննչական մարմին:
Ի պատասխան՝ քաղաքագետն ասաց. «Մեկնաբանություն չունեմ։ Իսկ տվյալ միջադեպի հետ կապված իմ հանրային դիրքորոշումը արդեն արտահայտել եմ հարցազրույցների եւ գրառումների տեսքով»։
Արփինե ՍԻՄՈՆՅԱՆ
