«Բավական բարդ է այս գործընթացները մեկնաբանելը, որովհետև օրինակ «Սպուտնիկ» լրատվականն Ադրբեջանում միայն ես եմ հիշում, որ երեք-չորս անգամ փակվում էր։ Այդ գործընթացները տարբեր ձևերով են տեղի ունեցել, այս անգամ ավելի սրված։ Իմ նեղ մասնագիտությունը չեն ռուս-ադրբեջանական հարաբերությունները, խորը վերլուծություն չեմ կարող անել։ Եթե ՀՀ-ն իրական կառավարություն ունենար, պետք է ստեղծված իրավիճակից փորձեր օգուտներ քաղել։ Ներկայացնել, որ ռուս-ադրբեջանական հարաբերությունները վատթարացման են գնում, այդպիսի եզրահանգում չէի անի։ Այսպես շատ անգամներ են եղել, բայց թե ինչքան կտևի այս անգամ, չեմ կարող ասել»,- լրագրողների հարցին՝ ինչպե՞ս կմեկնաբանեք Ադրբեջանում սկսված հակառուսական գործընթացները, ճեպազրույցում այսպես պատասխանեց «Պատիվ ունեմ» խմբակցության ղեկավար Հայկ Մամիջանյանը։
Հարցին՝ ինչպես ՀՀ ԱԺ նախագահ Ալեն Սիմոնյանն է կարծում, անհրաժեշտություն տեսնո՞ւմ եք ՀՀ-ում ռուսական հեռուստաալիքների հեռարձակումն արգելել, Հայկ Մամիջանյանը պատասխանեց․ «Ես նման անհրաժեշտություն չեմ տեսնում։ Ո՞նց է ստացվում, որ Ալեն Սիմոնյանը երկու տարի առաջ ասում էր՝ պատմության մեջ ամենառուսամետ կառավարությունն են, իսկ հիմա ունենք այն, ինչ ունենք։ Առհասարակ այս իշխանությունը մի հետաքրքիր տաղանդ ունի քարոզչական կեղծիքներ ստեղծելու։ Եկեք հիշենք այսպես կոչված պլանի հրապարակումը, որ պարտադիր ղարաբաղցիներին թիրախավորեն, չեն գրել՝ սևանցիները, գրել են ղարաբաղցիները, պարտադիր թիրախավորել են ՌԴ-ն։ ՀՀ ինքնիշխանությունը, անկախությունը վեր են ցանկացած քննարկումից, և մեր բոլոր գործընկերներին խնդրում կամ պահանջում եմ երբևէ չշփոթել ու ՀՀ-ի հետ ու մասին չխոսել այնպես, ինչպես արժանի է, որ Նիկոլ Փաշինյանի հետ և մասին խոսեն»։
Տաթև ՀԱՐՈՒԹՅՈՒՆՅԱՆ
