Թուրքագետ Մելինէ Անումեանը ֆեյսբուքյան էջում հայտնում է, որ ադրբեջանական ԶԼՄ-ները խանդավառությամբ գրում են, թե իրենց պատմության մեջ աննախադեպ քայլ է կատարվել ՔՊ-ական հայ պատգամավորների կողմից։
Մասնավորապես Tribunainfo.az լրատվական կայքն իր հրապարակման մեջ անդրադարձել է ԵԱՀԿ ԽՎ-ում «Հայաստան» դաշինքի պատգամավոր Լիլիթ Գալստյանի նախաձեռնությանը, որը հանդես էր եկել ԵԱՀԿ ԽՎ-ի «Ժողովրդավարություն, մարդու իրավունքներ և մարդասիրական խնդիրներ» բանաձևում փոփոխության առաջարկով։
Լիլիթ Գալստյանն առաջարկում էր «արձանագրել ԼԵՌՆԱՅԻՆ ՂԱՐԱԲԱՂ-ի հակամարտություն հասկացությունը, Ադրբեջանի կողմից հայկական մշակութային ժառանգության շարունակվող ոչնչացումը», ինչպես նաև՝ «պահանջում, որ մինչև գերիների անվերապահ վերադարձը, ԵԱՀԿ-ից կամ ԵԱՀԿ անդամ երկրներից դիտորդական առաքելություն ուղարկվի Բաքու՝ մշտադիտարկելու հայ ռազմագերիների և պահվող այլ անձանց պահման պայմանները և դատական գործընթացները»։
Թուրքագետը հրապարակել է ադրբեջանական կայքի անդրադարձի թարգմանությունը:
Կարդացեք նաև
«Ադրբեջանի հետ կապված չտեսնված քայլ հայ պատգամավորներից
Պորտուգալիայում կայացած ԵԱՀԿ ԽՎ նիստում տարօրինակ միջադեպ է տեղի ունեցել։
Ինչպես հաղորդում է Tribunainfo.az-ը, միջոցառմանը մասնակցող Ադրբեջանի և Հայաստանի պատգամավորները համատեղ քայլ են կատարել Ղարաբաղի, Բաքվում դատվող անջատողականների և Ղարաբաղում մշակութային ժառանգության հարցի վերաբերյալ։
Այսպես, հանդիպմանը մասնակցած «Հայաստան» դաշինքի պատգամավոր Լիլիթ Գալստյանը պատրաստել է Բաքվում դատվող անջատողականների, Ղարաբաղում «հայկական մշակութային ժառանգության» վիճակի, ինչպես նաև Ղարաբաղից արտագաղթածների վերաբերյալ բանաձևի նախագիծ և փորձել է այն քվեարկության դնել։ Սակայն առաջին հարվածը նա ստացել է իր հայ գործընկերներից. «Իշխող «Քաղաքացիական պայմանագիր» կուսակցության պատգամավորները մերժել են իմ պատրաստած բանաձևի նախագիծը և չեն աջակցել դրան։ Հետագայում ես իմացա, որ նրանք փոխըմբռնման և համաձայնության են եկել Ադրբեջանի պատգամավորների հետ»։
Ֆերդա Ուղուր»:
