Երեկ ՀՀ վարչապետի ֆեյսբուքյան գրառումը սկսվեց ՀԷՑ-ի աշխատակիցներին սպառնալով, թե ովքեր «իրենց գործը թողած զբաղված են քաղաքական խարդավանքներով, հուլիսին կազատվեն աշխատանքից»: Հասկանալի է, ակնարկը հուլիսի 4-ին սպասվող ՀՀ սահմանադրությամբ երաշխավորված խաղաղ հանրահավաքին մասնակցելը խոչընդոտելն է, վախեցնելը: Զարմանալի զուգադիպությամբ ՍԴ -ն նույն այդ ժամանակ հրապարակեց «Բռնության եւ ոտնձգության մասին կոնվենցիայի» ՀՀ սահմանադրությանը համապատասխանելու մասին որոշումը: Կառավարությունն է դիմել ՍԴ՝ սահմանադրականության հարցով:
Կոնվենցիան ընդունվել է 2019 թվականի հունիսի 21-ին Աշխատանքի միջազգային կազմակերպության գլխավոր համաժողովի կողմից: Կոնվենցիան վավերացվել է 49 պետության կողմից, ուժի մեջ է մտել 39 պետության համար:
Կոնվենցիայով սահմանվել է աշխատավայրի անվտանգության եւ առողջության պահպանումը, միջազգային չափանիշների համապատասխանեցումը, աշխատողների իրավունքների պաշտպանությունը, սոցիալ-տնտեսական զարգացումը, տնտեսական ծախսերի կրճատումը, գենդերային հավասարության պարտավորությունը եւ սոցիալական երկխոսությունը խրախուսելը: Հոդված 5-ով սահմանված է՝ «հարգել, խթանել եւ իրականացնել աշխատանքի հիմնական սկզբունքներն ու իրավունքները, մասնավորապես՝ միավորումներ կազմելու ազատությունը եւ կոլեկտիվ բանակցություններ վարելու իրավունքի արդյունավետ ճանաչումը…»: Հոդված 11-ը ըստ էության խրախուսում է իրականացող նախաձեռնությունները, այդ թվում՝ իրազեկման բարձրացմանն ուղղված արշավները:
Իսկ եթե, այնուամենայնիվ, սպասվող հանրահավաքում ՀԷՑ-ի աշխատակիցները «իրազեկման բարձրացմանն ուղղված» ակցիա են անում, դիմումատու կառավարությունը կգնա՞ խախտման:
Կարդացեք նաև
Ռուզան ՄԻՆԱՍՅԱՆ
«Առավոտ» օրաթերթ
03.07.2025
