«Հանրային քննարկումների կարգավորումները տրված են օրենքով, որտեղ տրված է նաեւ դրա բնորոշումը: Ինչ ենք հասկանում հանրային քննարկում ասելով՝ իրավաստեղծ գործընթացին հասարակության մասնակցության, գործընթացի թափանցիկության եւ հաշվետվողականության ապահովման նպատակով նորմատիվ իրավական ակտերի մասին օրենքով սահմանված՝ նորմատիվ իրավական ակտի նախագծի վերաբերյալ հանրության իրազեկման, ինչպես նաեւ հանրային կարծիքը բացահայտելու, դրա վերաբերյալ դիտողություններ եւ առաջարկություններ ստանալու ամփոփելու գործընթաց է դա:
Այսինքն` հենց բնորոշումը ցույց է տալիս, որ ցանկացած օրենքի նախագիծ, որն առնչվում է հանրության տարբեր շերտերի, դրա քննարկումը պետք է մասնակից դարձնի այդ շերտերին, որպեսզի հասկանան, թե շերտերն ինչ տեսակետ, առաջարկություններ եւ դիտողություններ ունեն նախագծի վերաբերյալ»,-«Արվեստի ձայնը» համաժողովի ժամանակ նշեց ԱԺ «Հայաստան» խմբակցության պատգամավոր Էլինար Վարդանյանը: Նա մեկնաբանում էր այն հարցը՝ արդյոք հանրային քննարկում ասվածը Հայաստանում ձեւական բնույթ է կրում:
Նրա խոսքով, ըստ էության օրենսդիրը կարգավորել է հանրային քննարկումը, ինչին մեկ ամբողջ գլուխ է նվիրել օրենքում, սակայն իրականությունում լրիվ այլ պատկեր է:
«Սովորաբար օրենքի նախագիծը տեղադրվում է e-draft-ում, տեղադրվում են հիմնավորումները, այն բաց է հարթակում դիտարկումեր եւ առաջարկություններ ներկայացնելու համար:
Կարդացեք նաև
Երբ նախագիծը գալիս է ԱԺ, ես ինքս չեմ զլանում՝ հետ եմ գնում ու նայում եմ e-draft-ում եղած առաջարկություններն ու դիտողությունները, որոնք հետո օրենքի նախագծում չես գտնի:
Այսինքն՝ սա զուտ ձեւական մի հարթակ է, որտեղ դու առաջարկությունդ ներկայացրու, ձեւ անենք, թե այդ հանրային հարթակում քննարկումը կայացել է, բայց առաջարկություններն ու դիտողությունները որեւէ կերպ հաշվի չենք առնելու»,-փաստեց պատգամավորը:
Էլինար Վարդանյանն ասաց նաեւ, որ պարբերաբար հետեւում է e-draft-ում տեղադրված նախագծերին, հատկապես, երբ դրանք մի քիչ վիճելի են կամ շոշափում են հանրության լայն շերտերի իրավունքները. «Առաջին 14 օրերի ընթացքում պասիվություն ես տեսնում, 15-րդ օրվա ընթացքում մեկ էլ կտեսնես ակտիվություն, նախագծին կողմ լինելու քվեարկություններ: Ստեղծվում է մի ռեալ իրավիճակ՝ e-draft-ն արտացոլում է մեր կյանքը. ինչպես ցանկացած հարցի վերաբերյալ տեղի են ունենում ֆեյքային հարձակումներ, այնպես էլ e-draft-ում կան ֆեյքային լցոնումներ»:
Գոհար ՀԱԿՈԲՅԱՆ
Լուսանկարը՝ «Հայաքվեի»
