«Նման մակարդակի գործարարն իր պատմական հայրենիքում տեսնում ենք՝ ինչի է ենթարկվել։ Ամոթալի է, որ միջազգային գործընկերներն այս ամենը տեսնում են»,- ի աջակցություն Սամվել Կարապետյանի հավաքի և երթի մեկնարկից առաջ լրագրողների հետ զրույցում ասաց Հայ գործարարների ասոցիացիայի գործադիր տնօրեն Գոհար Ղումաշյանը։
Նա մտահոգություն հայտնեց՝ չեն կարողանում միջազգային գործընկերներին բացատրել, թե ինչով կարող են պայմանավորված լինել ՀՀ-ի գրավչությունը այժմ՝ որպես ներդրումային երկիր․ «Հուսով ենք և ամեն ինչ անում ենք, որ այս ամենը շուտ ավարտվի, ու վերադառնանք մեր բնականոն բիզնեսին և երկրի տնտեսության զարգացման ուղուն»։
Լրագրողների փաստմանը՝ Սամվել Կարապետյանը մեղադրվում է իշխանությունը զավթելու կոչի համար և հարցին՝ այդ հայտարարության մեջ վտանգ տեսնո՞ւմ եք, Գոհար Ղումաշյանը պատասխանեց․ «Ես չեմ տեսնում վտանգ։ Այստեղ հազարավոր մարդիկ կիսում են իմ այս կարծիքը։ Չի կարող մի մարդ, որը իշխանության հետ չի առնչվում և պետական գործիչ չէ, քաղաքականությամբ երբևէ չի զբաղվել և չի էլ հավակնում զբաղվել, որևէ վտանգ հանդիսանա ՀՀ-ի համար։ Աբսուրդի ժանրից է։
Մենք բոլորս այստեղ ենք, որ ցույց տանք, թե ինչքան մարդ կա ի աջակցություն այդ մարդու և մեր ազգային արժեքների։ Դեռ մինչև օգոստոսի 18-ը Սամվել Կարապետյանը կմնա կալանքի տակ, ինչը ևս մեկ վատ միտք է, քանի որ այս տարի հենց այդ օրը, երբ լրանում է երկու ամիսը, Սամվել Կարապետյանի վաթսուն ամյակն է լինելու։ Բայց մենք հույս ունենք, որ ամեն ինչ լավ կլինի։ Բազմաթիվ միջազգային կազմակերպություններից մենք ստացել ենք աջակցության նամակներ, որ կիսում են մեզ հետ այն կարծիքը, որ չի կարող ժողովրդավար երկրում նման բան կատարվել գործարարի հանդեպ»։
Կարդացեք նաև
Տաթև ՀԱՐՈՒԹՅՈՒՆՅԱՆ
