Փորձագետ, Հայ-ռուսական համալսարանի դասախոս Կարեն Իգիթյանի ֆեյսբուքյան գրառումը
Եվ այսպես, ընկերներ, ինձ արգելեցին մուտք գործել Հայաստան։ Վերադառնում էի Երևան՝ Պյատիգորսկից, որտեղ մասնակցել էի «Կովկասյան երկխոսություն» միջոցառմանը և խոսել էի Կովկասում Թուրքիայից տարածվող ռադիկալիզմի մասին։
Հայաստան ժամանելուն պես Ազգային անվտանգության ծառայության Սահմանապահ զորքերի աշխատակիցները հայտնեցին, որ ինձ արգելված է մուտք գործել երկիր։ ԱԱԾ և օդանավակայանի անվտանգության ծառայության աշխատակիցների վերաբերմունքը շատ պրոֆեսիոնալ և համեստ էր։
Բայց իշխանություններին կան հարցեր (հռետորական)։
Կարդացեք նաև
Արգելքի պատճառը ո՞րն է՝ այն, որ հանդես էի գալիս Հայ առաքելական եկեղեցու պաշտպանությամբ լրատվամիջոցներում, թե՞ այն, որ խոսում էի Թուրքիայից տարածվող ռադիկալիզմի մասին։
Վերջին 16 տարիներն ապրում և աշխատել եմ Հայաստանում։ Վատ է, որ հիմա չեմ կարողանա տեսնել հարազատներիս, գործընկերներիս, ընկերներիս և ուսանողներիս։
Դասախոսները կհասկանան, թե ինչն է հատկապես ցավալի այս իրավիճակում՝ անհանգստանում ես նրանց համար, ովքեր սպասում էին մեր դասախոսություններին, ցանկանում էին գրել իրենց դիպլոմային աշխատանքները իմ ղեկավարությամբ։
Այս ամենը ոչ թե ավարտ է, այլ նոր փուլի սկիզբ։ Կապի մեջ կմնանք։
