Ավարտվեց բուհերի ընդունելության միասնական քննությունների լրացուցիչ՝ երրորդ փուլը: Այսօր կենսաբանություն հայտագրած վերջին դիմորդներն են քննություն հանձնել: Այս մասին Aravot.am-ին հայտնեց Գնահատման եւ թեստավորման կենտրոնի (ԳԹԿ) մամուլի պատասխանատու Խաչանուշ Գրիգորյանը: Նա ասաց, որ քննությունները տեղի են ունեցել Երեւանի Ջոն Կիրակոսյանի անվան թիվ 20 հիմնական դպրոցի քննական կենտրոնում:
«8 առարկա հանձնելու համար հայտագրվել էր 180 դիմորդ: Հուլիսի 4-ին տեղի է ունեցել հայոց լեզվի եւ հայ գրականության քննությունը,
հուլիսի 5-ին՝ հայոց պատմության եւ ֆիզիկայի, հուլիսի 6-ին՝ մաթեմատիկայի, հուլիսի 8-ին՝ քիմիայի և ռուսաց լեզվի, հուլիսի 9-ին՝ օտար լեզուների /անգլերեն/ եւ հուլիսի 10-ին՝ կենսաբանության քննությունները։
Այսօրվա քննության գնահատականները հայտնի կդառնան հուլիսի 11-ին։ Բողոքարկման դիմումների ընդունումը հաջորդ օրն է»,-ասաց Խաչանուշ Գրիգորյանը։
Նա հավելեց, որ մրցույթի արդյունքների հրապարակման վերջնաժամկետը հուլիսի 18-ն է. «Այդ օրն ընդունվածների ցուցակները կփակցվեն բուհերում, որից հետո դիմորդները, մուտք գործելով dimord.am կայքի իրենց էջ, կտեսնեն իրենց ընդունված կամ չընդունված լինելու մասին ԳԹԿ հաղորդագրությունը»։
Կարդացեք նաև
Գոհար ՀԱԿՈԲՅԱՆ
