Աբու Դաբիում կայացած Ալիեւ-Փաշինյան հանդիպման ժամանակ ձեռք բերված պայմանավորվածությունների իրական հետեւանքների մասին Հայաստանի պաշտոնական աղբյուրները գրեթե ոչինչ չեն ասում:
ՀՀ ԱԺ «Հայաստան» խմբակցության ՀՅԴ պատգամավոր Գառնիկ Դանիելյանը «Հայելի» ակումբում այս առնչությամբ ասաց. «Սա պլանավորած հանդիպումների մի շարք էր, որը տարիներ առաջ գծվել էր թուրք-ադրբեջանական տանդեմի կողմից: Նիկոլ Փաշինյանին այդ հանձնարարականներն ու ցուցումները տրվել են այդ ժամանակ: Ուզում եմ հիշեցնել, որ վերջերս Անկարա կատարած այցի ժամանակ Նիկոլ Փաշինյանը հանդիպելով հայ համայնքի ներկայացուցիչների հետ, ասել էր, որ մենք պետք է դառնանք թուրանական ծրագրի մաս: Այսինքն, Հայաստանի Հանրապետությունը պետք է դառնա այդ թուրանական ծրագրի բաղկացուցիչ:
Թե ինչ է նշանակում դա, եւս մեկ անգամ ասեմ, որ Բոսֆոր-Դարդանել նեղուցից մինչեւ Ալթայի Երկրամաս ծրագրի մաս պետք է կազմեն Կովկասը, միջինասիական երկրները: Այդ թուրանական ծրագիրը տարիներ առաջ հաստատվել է Թուրքիայի դոկտրինում: Անկարայում շատ կարեւոր հայտարարություններ հնչեցվեց Հայաստանի եւ սփյուռքի հետ կապված, որ հայկական սփյուռքը մեզ համար նշանակություն չունի եւ մենք սփյուռքի համար պատասխանատվություն չենք կրում: Այնուհետեւ Թուրքիայի խորհրդարանում մտցվեց մի խայտառակ օրինագիծ՝ Ալիջան անցակետը Թալեաթ փաշայի անունով կոչելու:
Արեւելքում խորհրդանիշերը շատ կարեւոր նշանակություն ունեն: Եվ սա էլ խորհրդանշական է, որ դուք այդ անցակետով անցնելիս՝ անցնելու եք Թալեաթ փաշայի սրի տակով: Սա հստակ մեսիջ է հայ ժողովրդին, որ Թուրքիայի ցեղասպանական քաղաքականությունը շարունակվում է: Հստակ մեսիջ է ամբողջ հայությանը, որ մնացած հայերը, որոնք ապրում են մեր երկրում՝ Հայաստանի Հանրապետությունում, եթե այսպես շարունակվի, առաջիկայում նույնպես ցեղասպանական գործընթացի շարունակությունն են լինելու»:
Կարդացեք նաև
Գառնիկ Դանիելյանը հիշեցրեց նաեւ Փաշազադեի ու Փաշինյանի սինքրոն հարձակումները Հայ Առաքելական Սուրբ եկեղեցու նկատմամբ: «Ամբողջ այս ընթացքը նորից չեմ պատմում, որովհետեւ քաջ գիտեք: Բայց ուզում եմ նաեւ ազգային բարերար Սամվել Կարապետյանի, հետո՝ սրբազանների ու այլոց նկատմամբ գործողությունների խրոնոլոգիան հիշեցնելով՝ հավաստիացնել, որ այս ամեն ինչը թուրքական այդ ծրագրի մի մասն է»,-ասաց «Հայաստան» խմբակցության պատգամավորը:
Աշոտ ՀԱԿՈԲՅԱՆ
