-Կառավարությունը պատրաստակամություն է հայտնել մեր պահանջագրի 12 կետից միայն մեկի շուրջ բանակցել՝ սոցիալական խնդիրների: Դրան զուգահեռ սոցցանցերով ամիսներ շարունակ իրենց կողմից թեզեր էին առաջ տարվում, թե այս ամենը ստամոքսակռիվ է: Այնինչ, այս ամբողջ ընթացքում մնացած կետերի շուրջ բանակցությունները փակուղի են տարել հենց իրենք՝ նույնիսկ քննարկման առարկա չդարձնելով,- այսօր Ազատության հրապարակում հանրահավաքի ժամանակ հայտարարեց Արցախցիների իրավունքների պաշտպանության խորհրդի անդամ Աշոտ Ավանեսյանը:
Ինչ վերաբերում է սոցիալական հարցերին, պարոն Ավանեսյանն ասաց, որ իրենք ի սկզբանե առաջարկել էին իրականացնել փոխկապակցված փաթեթային ծրագիր, որտեղ իրար փոխկապակցված կլինեն սոցիալական, բնակարանային, աշխատանքի ապահովման եւ մի շարք այլ հարցեր:
Ըստ Ավանեսյանի, սա առաջին հերթին ձեռնտու էր պետությանը, քանի որ մաքսիմալ քիչ ռեսուրսներ ծախսելով՝ հնարավոր էր ապահովել ավելի համապարփակ լուծումներ բոլորի համար: Այս ռազմավարական առաջարկը, բանախոսի խոսքով, կտրականապես մերժվել է, ստիպված են եղել բանակցել արդեն գործող ծրագրերի շուրջ:
Կարդացեք նաև
-Արդյո՞ք առանց բնակվարձի ծրագրի շարունակման մինչեւ բնակարանների ձեռքբերումը ի վիճակի ենք լուծել մեր խնդիրները, կարո՞ղ ենք չստանալով այդ աջակցությունը՝ շարունակել վճարել մեր բնակարանների վարձն ու հոգալ մյուս խնդիրները, իհարկե՝ ոչ: Տասնյակ հազարավոր ընտանիքների եկամուտների ցուցանիշները սարսափեցնող են: Ընդամենը թիրախային խմբերի համար ծրագիրը ժամանակավորապես շարունակվում է, այն էլ՝ ամիս առ ամիս կրճատվելով:
Բանախոսը հայտարարեց նաեւ, որ ամենաշատ այս հրապարակում իրեն տրվող հարցը սա է՝ բա ինչ է լինելու. «Ես խնդրում եմ բոլորիդ պետք է ուղղակի իրար կողքի լինենք, լսենք, փորձենք կառուցողական լինել: Այս պահի դրությամբ պետք է արձանագրենք, որ մեր դարդը ուրիշը չի տանելու, սա պետք է հասկանանք, որ հետագա անելիքների մասին մտածենք: Մեր ցավը տանողը մենք ենք»:
Ի դեպ՝ հանրահավաքից հետո արցախցիները անժամկետ նստացույց հայտարարեցին մինչեւ կառավարությունը կարձագանքի իրենց պահանջներին:
Խորհրդի անդամներից Սայիդա Պողոսյանը հայտարարեց, որ իրենց արգելել են վրան տեղադրել հրապարակում, իրենք փորձեցին բանակցել ոստիկանության հետ ու մերժում ստացան քայլերթ իրականացնելու հարցում: Նա կոչ արեց արցախցիներին մնալ հրապարակում ու ով ինչով կկարողանա, թող օգտակար լինի իրենց՝ քնապարկ, ջուր եւ այլ պարագաներ: Նա կոչ արեց մշակութային գործիչներին միանալ իրենց հայտարարություններով, որ ոստիկանության մտքով չանցնի ուժ կիրառել:
Արփինե ՍԻՄՈՆՅԱՆ
