– Ես՝ որպես ՀՀ լիարժեք քաղաքացի, պայքարելու եմ եւ ունեմ մեկ ճանապարհ՝ կամ դեպի տուն, կամ դեպի վերեւ: Իսկ տուն գնալու համար պետք է հզոր Հայաստանի Հանրապետություն: Իմ տունը Արցախում է ՝ Մարտունիում: Որպեսզի ունենանք հզոր Հայաստան, պետք է նաեւ արցախցին ապրի այստեղ ու զգա ինչպես տանը: Պետք է կանխել արցախցիների արտագաղթը մայր Հայաստանից,- այսօր Ազատության հրապարակում հանրահավաքի ժամանակ հայտարարեց արցախահայերի իրավունքների պաշտպանության խորհրդի անդամ Արտակ Մկրտչյանը:
Նա նաեւ ասաց, որ հետ չեն կանգնելու իրենց 12 պահանջներից:
Կարդացեք նաև
Արցախի նորանշանակ պետնախարար Նժդեհ Իսկանդարյանն էլ լրագրողներին ասաց, որ կառավարության հետ պայմանավորվածություն էր եղել, որ երկու ամսվա ընթացքում բարեփոխումներ պետք է լինեին. «Իրականում տեղի են ունեցել բարեփոխումները, բայց դրանք բավարար չեն: Ամենօրյա ռեժիմով ստանում ենք մեր քաղաքացիներից ահազանգեր, որ ամսվա վերջ այդ 40.000 դրամի աջակցությունը չստանալու դեպքում հայտնվելու ենք փողոցներում: Ինչպես խոստացել էինք, կազմակերպել ենք մեր հանրահավաքն ու անժամկետ նստացույց ենք հայտարարում. միաժամանակ կքննարկենք ինչպիսի ազդակներ կլինեն կառավարությունից, որից հետո խորհուրդը հանդես կգա հայտարարությամբ»:
Հարցին, թե ինչպես են վրան տեղադրելու, պարոն Իսկանդարյանն ասաց, որ կսպասեն հանրության արձագանքին. «Մենք դեռ նստացույց ենք անելու, կհասկանանք մեր հանրության արձագանքն ինչպես է լինելու, բնականաբար, եթե ունենանք հնարավորություն, այնպայման գնալու ենք այդ քայլին: Այնպես չէ, որ թողնելու ենք, գնանք: Բնականաբար, ինչ-որ պահի փորձելու ենք մեր խոստացածն իրականացնել»:
Արփինե ՍԻՄՈՆՅԱՆ
Լուսանկարները՝ Դավիթ ՂԱՀՐԱՄԱՆՅԱՆԻ
