Հուլիսի 9-13-ը Շվեդիայի Մալմո քաղաքում կայացավ WUKF (World Union of Karate-Do Federations) աշխարհի առաջնությունը, որտեղ Հայաստանը ներկայացրեց Կարատեի աշխարհի և Եվրոպայի չեմպիոն, MMA մարզաձևում արդեն 7/0 ռեկորդակիր, WKN վարկածի հաղթող Կամո Ունանյանը։
Մրցաշարի ընթացքում Ունանյանը հաղթանակ տարավ մի շարք փորձառու մարզիկների հետ մենամարտում, իսկ եզրափակչում արդեն գերազանցեց իտալացի մրցակցին և նվաճեց Հայաստանի կարատեի պատմության մեջ առաջին WUKF վարկածով աշխարհի առաջնության Ոսկե մեդալը։
«2021-ին WUKF վարկածով Ռումինիայում դարձա աշխարհի բրոնզե մեդալակիր, որից հետո՝ 2022-23 թթ․ մասնակցելով Եվրոպայի առաջնություններում, հաղթող ճանաչվեցի։ Դրանից հետո երկար ժամանակ ցանկանում էի հենց այս վարկածում նվաճել աշխարհի առաջնության Ոսկե մեդալը, սակայն վնասվածքներից ու այլ հանգամանքներից ելնելով, չէր հաջողվում մասնակցել։ Այս անգամ ամեն ինչ արեցի և նպատակս մեկն էր՝ միայն նվաճել Ոսկե մեդալը։ Ու այն այսօր արդեն իրականություն է», – մեզ հետ զրույցում ասաց Կ․ Ունանյանը։
Կարդացեք նաև
Մրցաշարից առաջ Կամոն ակտիվ մասնակցել է Դուբայում անցկացված ուսումնամարզական հավաքներին՝ լիովին կենտրոնանալով մարզումային գործընթացի վրա։
«Ինձ ոգեշնչում է այն, որ ես ամբողջությամբ տրամադրված եմ սպորտին։ Ես ապրում եմ սպորտային կարգապահական ռեժիմով՝ առանց շեղումների։ Մարզվում եմ, շարունակում եմ իմ բուժումները»,- անկեղծանում է Ունանյանն ու անդրադառնալով մեր այն հարցին թե ինչումն է կայանում մշտապես հաղթանակների գաղտնիքը, ընդգծեց․ «Իմ տարիների փորձն ու հետևողականությունը տալիս են իրենց պտուղները»։
Հավելենք, որ բոլորովին վերջերս Խորվաթիայում կայացած առաջնությունում Ունանյանը շիտորյու ոճով նույնպես դարձել էր աշխարհի չեմպիոն։ Սակայն, Ունանյանի 2025թ. մրցակցային պլանը շարունակում է մնալ հագեցած։ Առաջիկայում պատրաստվում է MMA մարզաձևում 2 մենամարտի, որից հետո՝ կմասնակցի Ռիգայում կայանալիք WUKF վարկածով Եվրոպայի առաջնությանը։
Հայաստանի կարատեի միության լրատվական
