«Կարծում եմ՝ պարոն Սիմիդյանն ինքը կմեկնաբանի կամ գուցե առիթ ունեցել է մեկնաբանելու աշխատանքից իր ազատումը կամ իր հրաժարականը։ Սրա մասով ես մեկնաբանելու անհրաժեշտություն չեմ տեսնում»,- կառավարության այսօրվա նիստից հետո լրագրողներին ասաց ՏԿԵ նախարար Դավիթ Խուդաթյանը՝ անդրադառնալով տեղեկությանը, որ շրջակա միջավայրի՝ արդեն նախկին նախարար Հակոբ Սիմիդյանն ազատվել է պաշտոնից, քանի որ Գորիսում ՔՊ քաղաքական ժողովի ժամանակ հակադրվել է Նիկոլ Փաշինյանին։
Դավիթ Խուդաթյանն ասաց, որ Գորիսում ՔՊ-ն քննարկել է աշխատանքային հարցեր։ «Ի՞նչ նկատի ունեք՝ հակառակ կարծիք հայտնել ասելով։ Քաղաքացիական պայմանագիր կուսակցությունը բաց է քննարկումների համար, եւ այդ աշխատանքային պրոցեսում հաճախ է լինում տարբեր կարծիքների արտահայտում։ Բայց որպես այդպիսին ընդգծված միջադեպ չի եղել»,- նշեց նա։
Մանրամասները՝ տեսանյութում
Կարդացեք նաև
Դավիթ Խուդաթյանն անդրադարձավ նաեւ Վաղարշապատ համայնքում սպասվող ընտրություններին։ Հիշեցնենք, որ Նիկոլ Փաշինյանի որոշմամբ Վաղարշապատ համայնքի ղեկավարի պաշտոնակատար է նշանակել Արգիշտի Մեխակյանը։
Խուդաթյանն ասաց․ «Մենք մտահոգություն չունենք ընտրությունների մասով։ Նախ շատ մրցունակ թեկնածու է առաջադրվելու Վաղարշապատ համայնքում։ Պարոն Մեխակյանն անցած ճանապարհ ունի եւ Արմավիրի մարզում, եւ համայնքներում։ Այնպես որ, մենք մտահոգվելու կարիք չունենք, պատրաստվելու ենք ընտրություններին, քաղաքական թիմը՝ պարոն Մեխակյանի գլխավորությամբ, պատրաստվելու է ընտրություններին, եւ մենք վստահ ենք, որ միավորվող համայնքի ընտրողների ձայների մեծամասնությունը կկարողանանք ստանալ»։
Ռոզա ՀՈՎՀԱՆՆԻՍՅԱՆ
