«Այն, ինչ տեղի ունեցավ Հայաստանում, դա լուրջ ազդակ է, որ որևէ մեկը մոտ չգա սեփական կարգուկանոնը հաստատած, հավսար-զգաստ անող իշխանություններին։ Սա է ժողովրդավարության հայկական մոդելը»,- Sputnik Արմենիա մուլտիմեդիոն մամուլի կենտրոնում հրավիրված մամուլի ասուլիսի ժամանակ կարծիք հայտնեց տնտեսագիտության դոկտոր, պրոֆեսոր, «Այլընտրանք» հետազոտական կենտրոնի ղեկավար Թաթուլ Մանասերյանը:
Նա նշեց՝ ուրախ կլիներ, եթե կայացած մասնագետներ լինեն պետական կառավարման համակարգում՝ հատկապես տնտեսության բլոկում․ «Ուրախ կլինեի, որ մենք կարողանայինք ոչ թե ի ցույց աշխարհի նման բանավեճ ունենալ, մկանները ցույց տալով` ուժ ցուցադրել, այլ դա ծառայեցնել մեր երկրին»։
Խոսելով տնտեսական բլոկի մեկուսացման մասին՝ Թաթուլ Մանասերյանն ասաց․ «Փոխվարչապետերի մակարդակով ունենք մարդիկ, որոնք ճանապարհ են անցել, կայացել, հասել են այնտեղ, բայց հետադարձ կապը չեն պահում, չեն ուզում լսել։ Միայն վարչապետին չպետք է ուղղել սա։ Հասկանում ենք, որ վարչապետը խիստ արգելք է դրել շփումների, և այն գործարարները, որոնք անձամբ վարչապետի համար խորոված են անում, հաճոյանում, նրանց կարող են անձամբ պահել իրենց շրջապատում։ Բայց չէ՞ որ դրանով իրական Հայաստանը չի վերջանում։ Կան մարդիկ, որոնք Հայաստանից դուրս պատրաստ են և անում են ՀՀ-ի համար լուրջ քայլեր»։
Տաթև ՀԱՐՈՒԹՅՈՒՆՅԱՆ
