Ամերիկացի աշխարհահռչակ դերասան Բրյուս Ուիլիսի առողջական վիճակը սրընթաց վատթարանում է։
Հոլիվուդյան աստղը, որը հայտնի է իր կուլտային ֆիլմերով, պայքարում է ճակատային-քունքային դեմենցիայի դեմ։ Այս հիվանդությունը նրան զրկում է խոսելու, շարժվելու եւ առօրյա գործերը ինքնուրույն կատարելու ունակությունից։
Ինչպես գրում է Economic Times-ը, 70-ամյա Ուիլիսը կարիք ունի շուրջօրյա խնամքի, եւ նրա կապը շրջապատող աշխարհի հետ գնալով ավելի է թուլանում։
2022 թվականին Բրյուս Ուիլիսը ավարտեց իր կինոկարիերան՝ այն բանից հետո, երբ բժիշկները նրա մոտ ախտորոշեցին աֆազիա՝ հիվանդություն, որն ազդում է հաղորդակցության վրա։
Սակայն 2023 թվականին նրա ընտանիքը հայտարարեց, որ վիճակը վատթարացել է, եւ ախտորոշումը հստակեցվել է՝ ճակատային-քունքային դեմենցիա։ Այս ծանր նյարդաբանական խանգարումը քայքայում է խոսքի եւ շարժողական ֆունկցիաները, ինչպես նաեւ ազդում է մարդու վարքի վրա։
Բրյուսը այլեւս չի կարող հիշել իր կյանքի հիմնական պահերը, այդ թվում՝ իր փայլուն կինոկարիերան։ Նրա ընտանիքը մշտապես նրա կողքին է՝ նրան շրջապատելով հոգատարությամբ եւ աջակցությամբ։
