Ավետիք Իսահակյանի տուն-թանգարանում ներկայացվեցին ավելի քան 20 թանգարանների հետ կապված տարբեր աշխատանքներ իրականացնող Մշակույթի զարգացման հիմնադրամի վերջին մեկ տարվա ընթացքում արված եւ ապագայում կայանալիք ծրագրերը:
Մշակույթի զարգացման հիմնադրամի հանրային կապերի պատասխանատու Ռոզա Գրիգորյանը նշեց, որ իրենք իրականացնում են թանգարանների հանրահռչակման, մարքեթինգի, հաշվապահական եւ այլ գործառույթներ:
Հիշեցրեց, որ հիմնադրամի հաջողված նախագծերից մեկը «Մայր աստվածություն. Անահիտից Մարիամ» ցուցադրության իրականացումն էր, երբ առաջին անգամ Հայաստանում ներկայացվեցին Բրիտանական թանգարանի հավաքածուից Անահիտ աստվածուհու բրոնզե արձանի գլուխն ու ձեռքը, ցուցանմուշները 6 ամսով տեղափոխվեցին Հայաստան: Նրա ձեւակերպմամբ, անկախ Հայաստանի պատմության մեջ սա աննախադեպ ցուցահանդես էր այցելուների թվով՝ 55 հազար:
Տեղեկացրեց, որ ի թիվս այլ նախագծերի, Մշակույթի զարգացման հիմնադրամը համակարգել է Հայաստանի մասնակցությունը Ֆրանկոֆոնիայի 19-րդ գագաթնաժողովին, եւ Փարիզի մշակութային ավանում Հայաստանի տաղավարի բովանդակային ձեւավորումն իրականացվել է մի շարք կազմակերպությունների կողմից, որոնց թվում նաեւ հիմնադրամն էր, Հենրիկ Իգիթյանի անվան գեղագիտության ազգային կենտրոնը, Տերյան մշակութային կենտրոնը, Կամերային երաժշտության ազգային կենտրոնը, Թումոն:
Կարդացեք նաև
Ռոզա Գրիգորյանն ընդգծեց, որ հիմնադրամի իրականացրած աշխատանքների արդյունքում Թանգարանային գիշերը նախորդ տարվա ցուցանիշից 100 հազարից ավելի այցելու է ունեցել:
Նրա խոսքում անդրադարձ եղավ Լոնդոնում վերջերս Հայաստանի մասնակցությանը՝ Բրիտանական թանգարանի միջազգային վերապատրաստման ծրագրի խորհրդի նիստին, ունեցել են հանդիպումներ ՄԹ առաջատար թանգարանների հետ: Անդրադարձ եղավ նաեւ թանգարանների հուշանվերային տնտեսության կազմակերպմանը:
Ավետիք Իսահակյանի տուն-թանգարանի տուն-թանգարանի տնօրեն Արմինե Ավետիսյանը լրագրողների հետ զրույցում ներկայացրեց Մշակույթի զարգացման հիմնադրամի եւ Ավետիք Իսահակյանի տուն-թանգարանի համագործակցության արդյունքները: Նշեց, որ այս տարի լրանում է մեծանուն բանաստեղծի ծննդյան 150-ամյակը, եւ իրենք արդեն ունեն նոր բրենդավորում եւ 150-ամյակի նոր տարբերանշան: Թանգարանի տնօրենը հայտնեց, որ ցանկանում են Իսահակյանին նոր շնչով եւ այսօրվա մարդուն հասանելի ներկայացնել, ու հիմնադրամի հետ համատեղ աշխատանքում կարողացել են ստեղծել այնպիսի տարբերանշան եւ թեմատիկ նյութ, որը պատասխանում է այն հարցերին, որը տալիս են ժամանակակից մարդիկ:
Արմինե Ավետիսյանը տեղեկացրեց, որ տարեսկզբին Լայպցիգում կայացել է Իսահակյանի հուշատախտակի բացումը, ստեղծվել է տեսանյութ Իսահակյան-Լայպցիգ կապի մասին, որն այսօր QR կոդով այնտեղ ցուցադրվում է:
Նշենք, որ երեկոյի ավարտին «Թանգարանային գիշեր» եւ թանգարանային ոլորտին առնչվող միջոցառումները լուսաբանած լրագրողները, լրատվամիջոցները, այդ թվում՝ Aravot.am-ը, ինչպես նաեւ տարբեր բլոգերներ պարգեւատրվեցին շնորհակալագրերով եւ խորհրդանշական նվերներով:
Թանգարանի այգում էլ ներկայացվեց Ավետիք Իսահակյանի «Աբու Լալա Մահարի» ստեղծագործությունը՝ ժամանակակից գեղարվեստական մեկնաբանությամբ։
Գոհար ՀԱԿՈԲՅԱՆ
