«Փաստինֆո». Քննչական կոմիտեի Տնտեսական հանցագործությունների և մաքսանենգությունների քննության գլխավոր վարչության շենքից 590 000 ԱՄՆ դոլարի հափշտակության գործով կալանավորված ՔԿ 5-րդ վարչության պետ Գոռ Թադևոսյանի խափանման միջոցը փոխվել է։ Նրա նկատմամբ կիրառվել է տնային կալանքը։
ՀՀ գլխավոր դատախազության հանրային կապերի բաժնի պետ Արեւիկ Խաչատրյանը «Փաստինֆո»-ին հայտնեց, որ մեղադրող կողմը պատրաստվում է բողոքարկել որոշումը։
Ինչպես արդեն հայտնել ենք, ՔԿ Տնտեսական հանցագործությունների և մաքսանենգության գործերով քննության գլխավոր վարչության շենքից հափշակվել է որպես իրեղեն ապացույց պահվող 590 000 ԱՄՆ դոլարը: Չարագործը ՔԿ շենք է մուտք գործել քննիչի կեղծ անցագրով։
«Փաստինֆո»-ն հայտնել է, որ դա տեղի է ունեցել աշխատանքային ժամին՝ մայիսի 20-ին՝ ժամը 16։30-ի մոտակայքում ու ամբողջ գիշեր մնացել այնտեղ։ Նույն անցագրով անձի ելքն արձանագրվել է մայիսի 21-ին՝ ժամը 08։30-ի սահմաններում։ Այսինքն՝ նա շուրջ 16 ժամ մնացել է շենքում, հանգիստ հափշտակել գումարը, իսկ առավոտյան, երբ քննիչները սկսել են գալ աշխատանքի, հեռացել է։
Կարդացեք նաև
Հատկանշական է, որ սա գողության առաջին փորձը չի եղել, դեկտեմբեր ամսին ևս փորձել են գողանալ չհրկիզվող պահարանում պահվող 590,000 ԱՄՆ դոլարը, որը եղել է շենքի վեցերորդ հարկում պահվող միակ գումարը, ինչի մասին իմացել են բոլոր քննիչները։
