«Հուլիսի 30-ը համարվում է Թրաֆիքինգի դեմ պայքարի միջազգային օր: Եվ այս խորհրդանշական օրն էլ մեկնարկում է «Կապույտ սիրտ» արշավը:
Անի Թաթոյան
«Արմենպրեսի» մամուլի սրահում կայացած ասուլիսում նշեց ՀՀ աշխատանքի և սոցիալական հարցերի նախարարության հավասար հնարավորությունների ապահովման վարչության՝ մարդկանց թրաֆիքինգի և կանանց հիմնահարցերի բաժնի ավագ մասնագետ Անի Թաթոյանը: Նա ներկայացրեց, որ նախարարությունը տարբեր գործընկերների հետ սկսում է հինգամսյա իրազեկման արշավ թրաֆիքինգի կանխարգելման թեմայով:
Արզուման Հարությունյան
«Աուդիո-Վիզուալ լրագրողների ասոցիացիա» ՀԿ-ի նախագահ Արզուման Հարությունյանի խոսքով, իրազեկման աշխատանքներն իրականացվում են ոչ միայն խոցելի խմբերի, այլ երիտասարդության շրջանում: Նա նշեց, որ իրենց առաջ խնդիր են դրել թրաֆիքինգի իրազեկման եւ կանխարգելման աշխատանքները տեղափոխել նաեւ ինտերնետ հարթակ, որովհետեւ մարդիկ առանձնացել են հասարակությունից եւ իրենց աշխատանքներն արդեն կազմակերպում են ինտերնետ միջավայրում, որտեղ էլ կարող են բախվել հնարավոր վտանգների:
Տիգրան Կիրակոսյան
ՀՀ քննչական կոմիտեի հատկապես կարևոր գործերի քննության գլխավոր վարչության մարդկանց թրաֆիքինգի, անչափահասների սեռական անձեռնմխելիության դեմ ուղղված և թմրամիջոցների ապօրինի շրջանառության հանցագործությունների քննության վարչության պետի տեղակալ Տիգրան Կիրակոսյանը ներկայացրեց վերջին 5 տարիների տվյալները:
Կարդացեք նաև
«2020թ հանրապետությունում գրանցված թրաֆիքինգի դեպքերը 10-ն են եղել, որոնցից մեկը՝ սեռական շահագործման դեպք էր: 2021թ. 16 քրեական գործ է հարուցված եղել, 7-ը՝ աշխատանքային, 9-ը սեռական շահագործման մասին: 2022թ. 8 քրեական գործ է հարուցվել, 8-ը՝ սեռական եւ նույնքան էլ աշխատանքային շահագործման համար:
2023թ 27 քրեական վարույթ է նախաձեռնվել, 4-ը՝ սեռական, 23-ը՝ աշխատանքային շահագործման վերաբերյալ:
2024թ 38 քրեական վարույթ է եղել, որոնցից 20-ը սեռական, 18-ը աշխատանքային շահագործման վերաբերյալ: Նաեւ 2025թ. առաջին կիսամյակի տվյալներով՝ 22 քրեական վարույթ է նախաձեռնվել, որոնցից 15-ը սեռական շահագործման վերաբերյալ, 7-ը՝ աշխատանքային»,-հայտնեց Կիրակոսյանը:
Նրա խոսքով՝ Հայաստանում առավել շատ տարածված թրաֆիքինգի տեսակներից են հարկադիր կամ պարտադիր աշխատանքները, ինչպես նաեւ սեռական շահագործման ձեւերը:
Մանրամասն տեսանյութում՝ քիչ անց:
Գոհար ՀԱԿՈԲՅԱՆ
