Ինստալյացիաներ, ձայնային փորձարկումներ, մուլտիմեդիա արվեստի գործեր և բազմաժանրային համերգներ․ «Նոթեյշնս» փառատոնով եզրագիծը հատեց «Նոթեյշնս» լաբորատորիան։ Ավելի քան 60 արվեստագետներ Հայաստանից և 9 այլ երկրներից Հայաստանի պետական ֆիլհարմոնիայում երկու շաբաթ իրականացրել են ինտենսիվ փորձարկումներ և ստեղծարար փոխանակումներ, որոնք ամփոփվել են փառատոնով, որի ընթացքում նրանք ներկայացրել են իրենց աշխատանքները։
hosq-ի կազմակերպած լաբորատորիան մեկտեղեց արվեստագետների, որոնք աշխատում էին տարբեր ոլորտներում՝ ձայն, երաժշտություն, վիզուալ արվեստ, անիմացիա, վիդեո արվեստ և արհեստական բանականություն՝ ուսումնասիրելու հայկական դասական երաժշտության ժառանգության և նորարարության հատման կետերը։ Հիմնվելով Armenian National Music-ի կողմից հատուկ թվայնացված Ավետ Տերտերյանի 3-րդ սիմֆոնիայի վրա՝ մասնակիցները արխիվային հայկական դասական երաժշտությունն օգտագործել էին նոր գեղարվեստական փորձարկումների համար։
«Նոթեյշնս»-ը ոչ միայն վերաիմաստավորեց հայկական երաժշտական ժառանգությունը, այլև ստեղծարար առումով վերափոխեց Հայաստանի պետական ֆիլհարմոնիան՝ միջոլորտային արտահայտման նոր ձևաչափերով։ Փառատոնի շրջանակում հանրությանը ներկայացվեցին անսպասելի գեղարվեստական հիբրիդներ, որոնք վերաիմաստավորեցին մշակութային ժառանգության դերը ժամանակակից ստեղծագործության մեջ։ Փառատոնն ունեցավ այցելուների մեծ քանակ։
«Նոթեյշնս»-ը վերահաստատեց, որ մշակույթը չի ավարտվում արխիվներում, այլ ապրում է ներկայի մեջ, վերամարմնավորվում է արվեստագետների միջոցով և խոսում է նոր լեզուներով։ Այս լաբորատորիան ցույց տվեց, թե ինչպես կարող են հնագույն մեղեդիները, մոռացված ձայներն ու դասական ստեղծագործությունները վերածվել փորձարարական հարթակների արվեստի, տեխնոլոգիաների ու գիտության հատման եզրում։ Արվեստագետների համատեղ աշխատանքը, տեխնոլոգիայի և ստեղծագործականության սինթեզը, ինչպես նաև տարբեր երկրներից ժամանած մասնակիցների փորձի փոխանակումն ապացուցեցին, որ հայկական դասական երաժշտությունը կարող է դառնալ ոչ միայն հիշողություն, այլ նաև շարժիչ ուժ՝ արդի արվեստում նոր հորիզոներբացելու համար»,-նշում են միջոցառման կազմակերպիչները։
