Իրավապաշտպան Զարուհի Փոստանջյանը երեկ տեղեկացրել էր, որ Գրիգոր Լուսավորիչ բժշկական կենտրոնում ակտիվիստ Ստեփան Սամվելյանին երկու ստենտ են դրել, վիրահատությունը անցել է նորմալ, եւ նրա առողջությունը դրական դինամիկայի մեջ է: «Ասացին, որ այս պահին բարդություններ արձանագրված չեն, եւ սպասում են, որպեսզի վաղը կրեատինինի նոր հետազոտություն անեն: Ասում են՝ չի բացառվում, որ վաղը նրան դուրս գրեն այս հիվանդանոցից: Եթե դուրս են գրում այս բաժանմունքից, ապա Ստեփան Սամվելյանը անպայման պետք է տեղափոխվի մեկ այլ բաժանմունք՝ կապված երիկամների անբավարարության հետ, որովհետեւ բարձր տոկոսի կրեատինինը շատ վտանգավոր է: Պարտադիր պետք է բժիշկների մշտական հսկողության տակ գտնվի: Եթե փորձեն Ստեփան Սամվելյանին նորից տեղափոխել «Արմավիր» ՔԿ դժոխքը, ապա ակնհայտ կլինի, որ հենց իրենք են սպանություն կազմակերպողները եւ սպանության փորձ կատարողները»,-հայտարարել էր տիկին Փոստանջյանը:
Ավելի ուշ իրավապաշտպանը տեղեկացրել է նաեւ, որ բժշկի հետ զրույցում պարզել է, որ ստենտավորումից հետո Ստեփան Սամվելյանի սիրտ-անոթային անբավարարությունը թեեւ մեղմացել է, սակայն կրեատինինի բարձր լինելը մնում է մտահոգիչ:
«Խնդիր կա, որպեսզի պարոն Սամվելյանի երիկամային անբավարարության հարցը նույնպես գտնվի բժիշկների հիվանդանոցային մշտական հոգածության ներքո: Ստեփան Սամվելյանը տառապել է երիկամային եւ սրտի սուր անբավարարությույունով, ամսի 21-ին այսպիսի տվյալներով հոսպիտալացվել է, եւ քննիչի պարտադրանքով են նրան տեղափոխել մեկուսարան»,-տեղեկացրել է Զարուհի Փոստանջյանը:
Աշոտ ՀԱԿՈԲՅԱՆ
