Ռուսաստանաբնակ հայ թենիսիստ Կարեն Խաչանովը Տորոնտոյում ընթացող ATP 1000 մրցաշարի եզրափակչում է: Նա $ 9 մլն. 193 հազ. 540 ընդհանուր մրցանակային ֆոնդով այս հեղինակավոր մրցաշարի կիսաեզրափակչում 2 ժամ 55 րոպեում 6:3, 4:6, 7:6 (7:4) հաշվով հաղթել է Գերմանիան ներկայացնող Ալեքսանդր Զվերեւին եւ հաղթողին որոշելու համար վճռորոշ դիմակայությունում կխաղա ամերիկացի Բեն Շելթոնի հետ:
Հաղթանակից հետո հրավիրված ասուլիսում Կարեն Խաչանովը կարծիք է հայտնել Տորոնտոյի մրցաշարի նոր ձեւաչափի մասին, որը տեւում է 12 օր: «Մրցաշարը մի փոքր ձգձգված տեսք ունի: Այն , կարծես, գտնվում է «Մեծ սաղավարտի» ու նախկին ձեւաչափով «մասթերսի» միջակայքում: Մի կողմից, մենք խաղում ենք մինչեւ երեք սեթ եւ ամեն երկրորդ օրը մեզ համար հանգստյան օր է: Մյուս կողմից էլ հարկադրված ես լինում կենտրոնացվածությունդ ավելի երկար ժամանակ պահել»,-հայտարարել է Խաչանովը:
Աշոտ ՀԱԿՈԲՅԱՆ
