«Այս նույն տարբերակը, ինչ մենք այսօր ունենք Վաշինգտոնի բանակցությունների արդյունքում, մենք մեր մասով առաջարկել ենք նաև ՌԴ-ին, մյուս գործընկերներին և այն, որ այստեղ ենք՝ Վաշինգտոնում և այս ձևով է մոտեցում ցուցաբերվում, պատճառն այն է, որ ԱՄՆ-ն շատ ակտիվ էր, նախագահ Թրամփը, նրա թիմն անձամբ ներգրավված էր։ Նաև նրբությունն այն էր, որ ԱՄՆ-ի կողմից մենք շատ ակտիվ և կենդանի ըմբռնում տեսանք տվյալ խնդրի շրջանակներում մեր արձանագրած սկզբունքների նկատմամբ, ինչը Խաղաղության խաչմերուկ նախագծի հիմնարար դրույթներն են՝ խոսքը տարածքային ամբողջականության, ինքնիշխանության, իրավազորության և փոխադարձության սկզբունքի մասին է։ Այդ առանցքային պատճառով է, որ առավել ակտիվացավ և հաջողություն գրանցեց այս ուղղությունը»,-հարցին՝ ինչո՞վ է տարբերվում ամերիկյան միջնորդությունը ռուսականից, Սպիտակ տանը տեղի ունեցած հանդիպումից հետո մամուլի ասուլիսի ժամանակ այսպես պատասխանեց ՀՀ վարչապետ Նիկոլ Փաշինյանը։
Նա շեշտեց՝ ոչ թե Աբու Դաբիում կամ այդ հանդիպումից հետո որոշեցինք, որ չենք կարողանում Ադրբեջանի հետ երկկողմ ձևաչափով բանակցել, այլ այս գործընթացը մի փոքր այլ նշանակություն ունի, քանի որ կենտրոնանում էր խաղաղության խաչմերուկի նախագծում ներդրումների իրականացման՝ ԱՄՆ ակտիվ ցանկության վրա․ «ԱՄՆ-ի ներգրավվածության մասով պետք է հաշվի առնենք հետևյալը․ գիտեք, որ մենք խաղաղության խաչմերուկ նախագիծը, երբ ձևավորեցինք, մենք այդ նախագիծն առաջարկել ենք մեր բոլոր գործընկերներին։ Առաջարկել ենք ներդրումներ իրականացնել այդ նախագծի շրջանակներում, և պետք է ասեմ, որ գործընկերների մի մասն առնվազն նախնական հետաքրքրություն ցուցաբերել էին այդ նախագծում ներդրումներ իրականացնելու վերաբերյալ, բայց մենք այս տարի հենց նախագահ Թրամփի վարչակազմի գործուն ցանկությունը զգացինք, ակտիվ հետաքրքրությունը զգացինք խաղաղության խաչմերուկ ծրագրի նկատմամբ, և դրանում ներդրումներ իրականացնելու՝ ամերիկյան հետաքրքրությունն ակնհայտորեն տարբերվում էր»։
Հարցին՝ իսկ ի՞նչ երաշխիքներ, որ Ադրբեջանը չի խախտի պայմանավորվածությունը, ինչպես դա արդեն արել է բազմաթիվ անգամներ, Նիկոլ Փաշինյանը պատասխանեց․ «Միշտ էլ այդ հարցը կարելի է տալ ցանկացած պայմանագրի և պայմանավորվածության համար։ Այսօրվա արարողության՝ հռչակագրի ստորագրման տրամադրությունը, իմ հայտարարությունները, նախագահ Թրամփի, Ադրբեջանի նախագահի հայտարարությունները, կարծում եմ, խոսում են որոշակի մթնոլորտի փոփոխության մասին։ Ստացվեց այնպես, որ իսկապես հայաստանցի լրագրողի հարցին, որը հենց դրա վերաբերյալ էր, նախագահ Ալիևի տված պատասխանին բան չունեի ավելացնելու, որովհետև նա պատասխանեց հենց այդ հարցին։ Ես կարծում եմ, որ կա հետաքրքրվածություն, և ԱՄՆ-ի ներկայությունը մեզ համար ակնհայտ է դարձնում, որ գործ ունենք մի շրջադարձային նշանակության պայմանավորվածության հետ, որից հրաժարումը օգտավետ չի կարող լինել կողմերից ոչ մեկին»։
Կարդացեք նաև
Այնուհետև նշեց․ «ՀՀ-ն ապաշրջափակվում է, Ադրբեջանն իր հերթին հնարավորություն է ստանում ՀՀ-ի տարածքով հուսալի կապ ունենալ Նախիջևանի հետ, ՀՀ-ն հնարավորություն է ունենում Ադրբեջանի տարածքով և Նախիջևանի տարածքով Սյունիքի մարզի հետ երկաթուղային կապ ունենալ․ սա ներքին հատվածն է։ ՀՀ-ն ստանում է հասանելիություն միջազգային երկաթուղային ցանցին դեպի ՌԴ, Իրան, դեպի Կենտրոնական Ասիա, դեպի Չինաստան և իհարկե, այստեղ կարող է հարց հնչել, որ այսօր Ադրբեջանն ունի երկաթուղային կապ նույն ՌԴ-ի հետ և այդպես շարունակ։ Մենք այս նախագծով ահռելի տարանցիկ բեռներ ենք հրավիրելու կամ բեռներն ուղղորդելու այս ճանապարհից օգտվելու։ Դա ահռելի եկամուտ է բերելու ՀՀ-ին և Ադրբեջանին։ Ինչո՞ւ հրաժարվել դրանից, ես այդ նպատակը գոնե այս պահին չեմ տեսնում»։
Տաթև ՀԱՐՈՒԹՅՈՒՆՅԱՆ
