Օգոստոսի 9 – Բնիկ ժողովուրդների միջազգային օր։
Այս օրը աշխարհը հիշեցնում է, որ յուրաքանչյուր բնիկ ժողովուրդ ունի անխախտելի իրավունք ապրել իր պատմական հողում և պահպանել իր մշակութային ինքնությունը։
Արցախի հայ ժողովուրդը՝ որպես տարածաշրջանի բնիկ ժողովուրդ, բռնի կերպով զրկվեց իր հայրենիքից Ադրբեջանի տարիներ շարունակ վարվող հետևողական քաղաքականության արդյունքում։ Այս քաղաքականությունը ներառում է ոչ միայն ժողովրդի տեղահանումը, այլև նրա բազմադարյա մշակութային ժառանգության համակարգված ոչնչացումը և յուրացումը։
Այսօր Արցախի քաղաքների, գյուղերի և սրբավայրերի տեղում ադրբեջանական իշխանությունները ջնջում են այն ամենը, ինչ վկայում է հայկական ներկայության մասին։ Տաճարներ, խաչքարեր, հուշարձաններ, թանգարանային հավաքածուներ՝ բոլորը գտնվում են անդառնալի կորստի վտանգի տակ։
Կարդացեք նաև
Այս գործողությունները բացահայտորեն հակասում են միջազգային մարդասիրական իրավունքի և ՅՈՒՆԵՍԿՕ-ի հռչակած արժեքների հիմնարար սկզբունքներին։ Միջազգային հանրությունը պարտավոր է տալ հստակ և վճռական գնահատական՝ ոչ միայն կանխելու մշակութային ցեղասպանության շարունակությունը, այլև երաշխավորելու Արցախի ժողովրդի անվտանգ և արժանապատիվ վերադարձի իրավունքի իրականացումը։
Լուսանկարում՝ փոքրիկ արցախցի՝ Արցախի Հանրապետության դրոշով։ Նրա հայացքի մեջ կա վստահություն, որ իր տունը, իր քաղաքը, իր հողը կրկին կդառնան նրա մանկության ու ապագայի մաս։
Արցախի մշակույթի նախարարություն
