Մատաղ սերնդի կրթության եւ քրիստոնեական դաստիարակության շնորհակալ գործը Ոգու Շինարար Հայրապետի տեսլականում չէր սահմնափակվում զուտ հայորդյաց տուն հաստատության առաքելությամբ: Դրա բնական շարունակությունը եղավ Ամենայն Հայոց Հայրապետի հանձնառությամբ «Հայոց Եկեղեցու պատմություն» առարկայի ներմուծումը հանրակրթական դպրոցի ծրագիր:
Այս նախաձեռնությունը միտված էր աճող սերնդի մեջ դաստիարակելու այն գիտակցությունը, որ դարերի հոլովույթում Հայոց Եկեղեցու անդուլ մաքառման շնորհիվ է պահպանվել հայի կենսունակության խորհուրդը, որ, հակառակ պատմության փոթորիկների, նա երբեք չի դադարել լինել հայ ժողովրդի ազատության հույսի սերմնացանն ու ցեղի ոգու հոգեշունչ ռազմիկը: Նրա խորանից է խրթին խավարում հնչել մեր ինքնության հիմնը, դարձել խոհ եւ պայքար՝ ճեղքելով լույսի ճանապարհը:
Այսօր էլ Հայոց Եկեղեցին է այն կամուրջը, որ կապում է աշխարհասփյուռ հայությանը հայրենի հողին, նա է ազգի եւ ազգայինի շարունակականության երաշխավորը, մեր լինելության վառ երազի արթուն պահապանը, մեր ինքնության անխորտակ սյունն ու հենարանը: Այս գիտակցությունն է մեր հաղթանակների գրավականը, սա է մեր ուղին, կամ ինչպես բանաստեղծն է ասում՝ Մրրիկով կերտուած վէպը մեր սրտի:
Տեր Գևորգ եպիսկոպոս ՍԱՐՈՅԱՆ
Կարդացեք նաև
