11 տարի է՝ ինչ «Երիտասարդական նախաձեռնությունների կենտրոն» ՀԿ-ի նախաձեռնությամբ Գյումրիում անընդմեջ նշվում է երիտասարդության միջազգային օրը։ Այս տոնը ՄԱԿ-ի գլխավոր ասամբելայի կողմից պաշտոնապես ընդունվել է 1999 թվականի դեկտեմբերի 17-ին։
Տոնը աշխարհի տարբեր երկրներում սովորաբար նշվում է տարաբնույթ միջոցառումներով՝ համաժողովներով, ցուցահանդեսներով, ֆլեշմոբեր, համերգներով, փառատոներով։
Ամեն տարի խորագիրը փոխվում է․ մեկ ուշադրություն են դարձնում աղքատության դեմ պայքարին, մեկ կլիմայի փոփոխությանը, միգրացիային, այս տարի այն կրում է «Երիտասարդական տեղական նախաձեռնություններ՝ կայուն զարգացման նպատակներին ու ավելիին հասնելու համար» խորագիրը։
Կարդացեք նաև
«Երիտասարդական նախաձեռնությունների կենտրոն» ՀԿ խորհրդի նախագահ Արթուր Նաջարյանը ՄԱԿ-ի բնակչության հիմնադրամի հայաստանյան գրասենյակի ղեկավար Լուսինե Սարգսյանը և Գյումրու քաղաքապետարանի մշակույթի և երիտասարդության հարցերի բաժնի պետ Լիլիթ Թովմասյանը այսօր համատեղ մամուլի ասուլիս էին հրավիրել՝ խոսելով ինչպես երիտասարդների հիմնախնդիրներից, «Երիտասարդական քաղաքականության մասին» նոր ընդունված ՀՀ օրենքից, այնպես էլ մանրամասնելով օրվան նվիրված միջոցառումների ցանկը։ Տոնը այս տարի ևս նշվում է այս երեք կառույցների համագործակցությամբ։
«Երիտասարդական նախաձեռնությունների կենտրոն» ՀԿ խորհրդի նախագահ Արթուր Նաջարյանն ասաց․ «Մեզ համար մեծ պատիվ է 11-րդ տարին անընդմեջ Հայաստանի Հանրապետության երկրորդ քաղաքում՝ Գյումրիում, նշել երիտասարդության միջազգային օրը։ Սա բացառիկ ու կարևոր հնարավորություն ու հարթակ է խոսելու Հայաստանի, մասնավորապես Գյումրի քաղաքի ստեղծարար երիտասարդության, երիտասարդական ուժի և առհասարակ երիտասարդության մասնակցության մասին՝ թե՛ պետականաշինության գործում և թե՛ իրենց նախաձեռնություններով համայնքներում դրական փոփոխություններ բերելու»։
Ըստ նրա, այս տոնը ուրախ տրամադրություն հաղորդելուց բացի, հիանալի հնարավորություն է երիտասարդների ձայնը լսելի դարձնելու և երիտասարդության դերը համայնքում՝ որպես կարևոր հենաշարժիչ ուժի մեկ անգամ ևս արժևորելու։
«Ինչքան էլ ամեն տարի այս մասին խոսում ենք, ցավոք, ամեն տարի նաև փաստում ենք, որ շատ հաճախ երիտասարդին դիտարկում են ավելի շատ ածանցյալ, ավելի շատ խնդիր, ոչ թե հնարավորություն։ Իսկ մեր նմանատիպ նախաձեռնությունները և ջանքերը հասարակության այդ մտածողության մեջ փոփոխություն մտցնելն է։ Միգուցե երիտասարդը շատ ավելի անփորձ է, բայց շատ ավելի ստեղծարար է և միաժամանակ շատ ավելի հեռուն մտածող է»,-ասաց Արթուր Նաջարյանը։
Նա նշեց, որ գործընկերների հետ համատեղ ամեն ջանք գործադրում են, որ երիտասարդների կարողությունները զարգացնեն և ունենան այնպիսի միջավայր, որտեղ երիտասարդը կկարողանա իր համայնքում դրական փոփոխություններ իրականացնել։
ՄԱԿ-ի բնակչության հիմնադրամի հայաստանյան գրասենյակի ղեկավար Լուսինե Սարգսյանն էլ կարևորեց այն, որ երիտասարդների միջազգային օրն այս տարի նշում են՝ արդեն իսկ ունենալով «Երիտասարդական քաղաքականության մասին» ՀՀ օրենք, որը կարգավորում է ոլորտը, սահմանում է երիտասարդների տարիքային շեմը։
«Հենց օրենսդրության մակարդակում ենք երիտասարդներին ճանաչում որպես բնակչության խումբ, որոնց նկատմամբ հատուկ վերաբերմունք պիտի ցուցաբերենք։ Ինչո՞ւ, որովհետև ժողովրդագրական փոփոխությունները բերում են նրան, որ աշխարհի շատ երկրներում, այդ թվում Հայաստանում փոքրաքանակ երիտասարդները հոգում են ավելի մեծաքանակ տարեց կամ տարիքով ավելի մեծ սերնդի կարիքները՝ աշխատելով, արարելով։
Այս պարագայում շատ ավելի կարևոր և արդիական է դառնում երիտասարդների հիմնախնդիրներին ուշադրություն դարձնելը»,-ասաց Լուսինե Սարգսյանը։
Նա նշեց, որ ՄԱԿ-ի բնակչության հիմնադրամն ամեն տարի հրապարակում է «Աշխարհի բնակչությունը» վերնագրով զեկույցը ու ամեն տարի մի թեմա են վերցնում՝ ուսումնասիրություն կատարելով։
Այս տարի հետազոտությունները վերաբերել են երեխաներ ունենալու երազանքի իրականացմանը։
«Ամբողջ աշխարհում 14 հազար մարդ մասնակցել է հարցմանը, ընդհուպ երիտասարդներ, շատերը օրինակ՝ նշել են, որ իրենք չեն կարողանում իրենց երեխա ունենալու երազանքն իրականացնել՝ տնտեսական խնդիրների, կոնֆլիկտների, համավարակների և այլ խնդիրների պատճառով։
Սա ինդիկատոր է, որ մենք այստեղ խնդիր ունենք, և եթե երիտասարդներն իրենց պոտենցիալն այս առումով չեն օգտագործում, կարող է բազում խնդիրներ բերել։ Եվ այս առումով է, որ մենք պիտի համատեղ ջանքեր գործադրենք, որպեսզի երիտասարդի երազանքն իրականացնելու համար լինի բարեհաճ և ճիշտ միջավայր, որպեսզի իրենք իրենց ապագան կարողանան կառուցել այնտեղ, որտեղ ցանկանում են, և այդ ապագան լինի լավ»,-ասաց Լուսինե Սարգսյանը։
Գյումրու քաղաքապետարանի մշակույթի և երիտասարդության հարցերի բաժնի պետ Լիլիթ Թովմասյանն էլ խոսեց երիտասարդական նախաձեռնությունները ֆինանսավորելու մասին։
Նա նշեց, որ մինչ այս երիտասարդական բոլոր նախաձեռնությունները ֆինանսավորել են քաղաքապետարանի մշակույթի և երիտասարդության հարցերի բաժնին հատկացված չափաբաժնից, որը ոչ միշտ է հնարավոր եղել ճիշտ և համաչափ բաշխել։
«Այս տարի մենք ունենք ուրախալի մի լուր․ 2025 թվականից Գյումրու համայնքային բյուջեում առանձին 10 միլիոն դրամ է հատկացված երիտասարդական նախաձեռնությունների և երիտասարդական ծրագրերի իրականացման համար, ինչը որպես ոլորտը համակարգող մարդ՝ ինձ համար մեծագույն օժանդակություն է և ձեռքբերում, որովհետև շատ դժվար է եղել մինչ այս պահը առանց այդ էլ փոքր գումարից առանձնացնել մշակութային միջոցառումներից բացի երիտասարդական նախաձեռնությունների հատվածը։
Հիմա, երբ արդեն այս հանգամանքը կա, կկարողանանք ավելի հեշտորեն և արդյունավետ կերպով նպաստել համայնքային երիտասարդական նախաձեռնությունների իրականացմանը, կկարողանաք շատ ավելի լայն համագործակցային շրջանակ ունենալ»,-ասաց Լիլիթ Թովմասյանը։
«Երիտասարդական նախաձեռնությունների կենտրոն» ՀԿ խորհրդի նախագահ Արթուր Նաջարյանն էլ հավելեց, որ Գյումրին իր ստեղծարար և ակտիվ երիտասարդությամբ Հայաստանում այսօր դարձել է գաղափարների ոգեշնչման կարևոր կիզակետ։
Ըստ նոր օրենքի, համայնքապետարանները պարտավորվում են երիտասարդական միջավայր ձևավորել համայնքներում, երիտասարդական աշխատողներ ունենալ, մինչդեռ Գյումրիում այդ միջավայրն արդեն իսկ ձևավորված է։
Գյումրիում օրվա խորհրդին նվիրված տոնակատարությունները բազմաբնույթ են, դրանք սկսվել են Թատերական հրապարակից։ Ինչպես նշում է Արթուր Նաջարյանը, դրանք ինտելեկտուալ ժամանց պարունակող միջոցառումներ են։ Դրանց թվում կան նաև սպորտային միջոցառումներ։
Գյումրիում երիտասարդության համաշխարհային տոնին ակտիվորեն մասնակցում են նաև տարբեր երկրներից այս քաղաքում հյուրընկալված «Եվրոպական համերաշխության կորպուս» ծրագրի շրջանավարտները․ 20 կամավորներ՝ շուրջ 4 երկրներից։
Երեկոյան կլինի մեծ՝ բացօթյա համերգ։
Ի դեպ, տոնը Գյումրիից բացի սկսել են նշել նաև Հայաստանի տարբեր քաղաքներում, վաղը այն կնշվի այս տարի Հայաստանի երիտասարդական մայրաքաղաք ճանաչված Ապարանում։
Նունե ԱՐԵՎՇԱՏՅԱՆ
