«Երբ քո հակառակորդը պետությունն է, երբ գործ ունես իրավական գործիքների հետ, բայց ակնհայտ է, որ հաշվի առնելով ապացույցների ի սպառ բացակայությունը, որ անգամ մեղադրանքն անհնար է հասկանալ, բարեգործի նկատմամբ կատարվողն ամոթալի է։ Կոչ եմ անում ՀՀ իշխանություններին դադարեցնել մեղադրանքը։ Իմ կարիերայում ես երբևէ նման ամոթալի բան որևէ երկրում չեմ տեսել»,- լրագրողների հետ ճեպազրույցում անդրադառնալով «Տաշիր» խմբի ընկերությունների սեփականատեր, ռուսաստանաբնակ հայ գործարար, բարերար Սամվել Կարապետյանի մեղադրանքին՝ հայտարարեց միջազգային հայտնի իրավաբան Ռոբերտ Ամստերդամը։
Նրա հավաստմամբ՝ բացարձակ ամոթալի է առաջադրել մի մեղադրանք, որն իսպառ, ամբողջովին անհավանական է․ «Բանտարկել տարիքով մարդու, գնալ այդ տարբերակին՝ բանտում պահելով մարդկանց, որոնք իրենց կյանքը նվիրել են երկրին, որոնք երբևէ իրենց կյանքում իրավախախտում չեն կատարել և պնդել, որ պետք է բանտարկություն, դա բացարձակ ամոթալի է։
Լրագրողների դիտարկմանը՝ տարբեր քաղաքական գործիչների, այդ թվում՝ Թրամփի վարչակազմին մոտ կանգնած անձանց իրավապաշտպանությունն եք ստանձնել և հարցին՝ արդյոք այդ կապերը չե՞ն խանգարի Ձեզ մարտահրավեր նետել ՀՀ իշխանություններին՝ հաշվի առնելով, որ ՀՀ իշխանությունները՝ ի դեմս Նիկոլ Փաշինյանի Դոնալդ Թրամփի աջակցությանն են արժանացել, փաստաբանը պատասխանեց․ «Որպես մարդ, որը ցանկանում է տեսնել ՀՀ-ի հաջողությունը, ես չեմ համարում, որ նախկինում ինչ-որ մեկի՝ իմ կողմից ներկայացուցիչ լինելը որևէ խնդիր է ներկայացնում։ Ինձ վարձել են, որովհետև արդյունավետ եմ և մտադիր եմ արդյունավետ լինել ՀՀ-ում։ Երբ ես աշխատում եմ Քրիստոսի զավակների համար, ես ամենաարդյունավետն եմ այդ ժամանակ, քանի որ այս գործերով ընդամենը հավատացյալ մարդիկ են, որոնք ուզում են պաշտամունքի, կրոնի ազատության իրենց իրավունքն իրացնել, իրենց եկեղեցական, հոգևոր կյանքին մասնակից լինել։ Իրավաբանի, փաստաբանի համար ավելի բարձր առաքելություն չի կարող լինել, քան ներկայացնել մարդկանց, ում հավատքն առ Քրիստոս կառավարել է իրենց ամբողջ կյանքում»։
Կարդացեք նաև
Փաստաբանը չցանկացավ խոսել իրենց հետագա ծրագրերի մասին ու ասաց․ «Լինելով փաստաբան՝ այս տարիներին մի բան եմ հասկացել, որ ռազմավարությունդ մամուլին պետք չէ ներկայացնել։ Մենք կսպասենք, մինչև տեսնենք քայլ առ քայլ, փուլ առ փուլ՝ աղոթելով, որ ՀՀ կառավարությունը կվերադառնա խելամտության դաշտ, երբ հանգուցալուծման հնարավոր կլինի հասնել»։
Տաթև ՀԱՐՈՒԹՅՈՒՆՅԱՆ
