«Այո՛, ես 50 օր անազատության մեջ եմ, բայց երբեք այնքան ազատ չեմ եղել, որքան այս 50 օրը։ Չկա մի վայր, որտեղ Աստված ներկա չլինի, այդ ո՞ւր պետք է մեկուսացնեք ինձ, որպեսզի ես զրկվեմ Աստծու ներկայությունից։ Չկա՛ այդպիսի վայր այս աշխարհում։ Եվ վա՛յ այն հոգեւորականին, որ կվախենա, կընկճվի, կընկրկի։ Ես ինչ ասում եմ, նույնը վաղը կարող է ասել Բագրատ սրբազանը։ Նպատակը մեզ խոշտանգելն է, բայց մենք չենք խոշտանգվում»,- այսօրվա դատական նիստի ժամանակ ասաց Հայ առաքելական եկեղեցու Շիրակի թեմի առաջնորդ Միքայել արքեպիսկոպոս Աջապահյանը։
Նա նշեց, որ չի կալանավորվել ԽՍՀՄ տարիներին, գերի է ընկել ադրբեջանցիների ձեռքը եւ ազատվել է, չի կալանավորվել Սերժ Սարգսյանի եւ Ռոբերտ Քոչարյանի իշխանության տարիներին, որոնց նույնպես քննադատել է։ «Եվ պետք է հասնեի «լուսավոր այս հեղափոխական, դեմոկրատ» երկիրը, որպեսզի ես կանալավորվեի որպես հանցագործ։ Սա այս իշխանությունների խայտառակությունն ու խարանն է, անկախ նրանից՝ ես կազատվեմ, թե կնստեմ 5 տարի։ Բայց այս իշխանություններն ավելի մեծ խարան էլ ունեն՝ Արցախի կորուստ, 5000 զոհ եւ այլն։ Բայց եթե դրա համար մեղադրում են նախկիններին, մեր ձերբակալության ու կալանավորման համար նախկիններին մեղավոր չեն կարող համարել, Սերժն ու Քոչարյանը չեն մեզ կալանավորել ու «գցել խեղճ վարչապետի ջեբը»։ Մեզ կալանավորել է այս դեմոկրատիկ կոչված խեղկատակ իշխանությունը»:
Դատավոր Արմինե Մելիքսեթյանն ընդհատեց Միքայել սրբազանին եւ հորդորեց ավարտել իր խոսքը։
«Ես բացարձակապես վատ չեմ զգում իմ կալանավորումից, ես ամաչում եմ իմ երկրի, իմ Հայաստանի համար, որին ծառայել եմ 50 տարի»,- եզրափակեց Միքայել սրբազանը։
Կարդացեք նաև
Նշենք, որ Երեւանի առաջին ատյանի ընդհանուր իրավասության քրեական դատարանի Ավան նստավայրում ընթանում է Հայաստանյայց առաքելական սուրբ եկեղեցու Շիրակի թեմի առաջնորդ Միքայել արքեպիսկոպոս Աջապահյանի գործով առաջին դատական նիստը։
Ըստ հրապարակված մեղադրական եզրակացության՝ «Գևորգ /Միքայել/ Արտաշեսի Աջապահյանին մեղադրանք է առաջադրվել այն բանի համար, որ նա ունենալով արքեպիսկոպոսի հոգեւոր աստիճան եւ հանդիսանալով Հայ Առաքելական Սուրբ Եկեղեցու Շիրակի թեմի առաջնորդը, պարբերաբար հրապարակային ելույթներով հանդես գալով զանգվածային լրատվության միջոցներով, ունենալով մեծ թվով հետեւորդներ եւ հետեւաբար նաեւ՝ իր խոսքով հասարակության անդամների վարքագիծն ուղղորդելու զգալի հնարավորություն, համաձայն չլինելով ներքին եւ արտաքին քաղաքականության հետ կապված հարցերի վերաբերյալ ՀՀ կառավարության դիրքորոշումների հետ, օգտագործելով զանգվածային լրատվության միջոցները, տեղեկատվական ու հաղորդակցական տեխնոլոգիաները, նախ՝ 2024 թվականի փետրվարի 3-ին՝ ապա նաեւ՝ 2025 թվականի հունիսի 21-ին, զանգվածային լրատվության միջոցների ներկայացուցիչներին տրված հարցազրույցների ընթացքում հնչեցրել է իշխանությունը զավթելուն ուղղված հրապարակային կոչեր»։
Ամբողջական տեսանյութը՝ այստեղ
Ռոզա ՀՈՎՀԱՆՆԻՍՅԱՆ
