ԱՄՆ նախագահ Դոնալդ Թրամփն Ուկրաինային անվտանգության «հզոր» երաշխիքներ և «շատ օգնություն» է խոստանում։ «Շատ, շատ օգնություն կլինի անվտանգության հարցերում։ Շատ օգնություն կլինի: Դա լավ կլինի», հայտարարել է Թրամփը Ուկրաինայի նախագահ Վլադիմիր Զելենսկիի հետ հանդիպման ժամանակ։
Ընդ որում, նա մերժել է ՆԱՏՕ-ին Ուկրաինայի անդամակցության հնարավորությունը։ ԱՄՆ նախագահը նաև Եվրոպան անվանել է պաշտպանության առաջին գիծ և հավելել, որ իր երկիրը նույնպես պատրաստվում է օգնել:
Հարցին, թե որքան օգնություն է Վաշինգտոնը պատրաստ փոխանցել Կիևին, Թրամփն ասել է. «Մենք հիմա Ուկրաինային ոչինչ չենք տալիս, մենք զենք ենք վաճառում»:
Նա նաև հայտարարել է, որ չի ցանկանում «ոչ մի հրադադար», այլ ցանկանում է հրադադար և երկարատև խաղաղություն:
Կարդացեք նաև
Թրամփը հրաժարվել է պատասխանել հարցին՝ «ո՞ւմ խաղաքարտերն են ավելի ուժեղ»՝ Ուկրաինայի, թե՞ Ռուսաստանի։ «Ես սիրում եմ ուկրաինացիներին, ես սիրում եմ բոլոր մարդկանց, ես սիրում եմ ռուսներին։ Եվ ուզում եմ կանգնեցնել այդ պատերազմը»,- հավելել է ԱՄՆ նախագահը։
«Կա՛մ այսօր համաձայնության կգանք, կա՛մ Ուկրաինային աջակցությունը կդադարի», նշել է Թրամփը։ ԱՄՆ նախագահը, պատասխանելով այն հարցին, թե քննարկվո՞ւմ է արդյոք Ուկրաինայում եվրոպական ուժերի ներկայության հարցը, նշել է, որ այդ մասին կարող է հայտարարվել ԵՄ առաջնորդների հետ հանդիպումից հետո։
Թրամփը հայտնել է, որ Զելենսկիի և եվրոպացի առաջնորդների հետ հանդիպումից հետո հեռախոսազրույց է ունենալու Պուտինի հետ։ «Եթե այսօր ամեն ինչ լավ ընթանա, մենք կունենանք եռակողմ հանդիպում, և կարծում եմ, պատերազմն ավարտելու ողջամիտ հնարավորություն կընձեռվի»։
Վլադիմիր Զելենսկին հայտարարել է Ուկրաինայում նախագահական ընտրություններ անցկացնելու պատրաստակամության մասին, եթե կնքվի խաղաղության պայմանագիր և համաձայնություն ձեռք բերվի անվտանգության երաշխիքների վերաբերյալ: «Մենք պատրաստ ենք ընտրությունների, բայց մեզ անվտանգություն է պետք, մեզ ազնիվ ընտրություններ են պետք։ Հիմա, երբ պատերազմ է, չենք կարող այն անցկացնել»։
Այնուհետեւ նախագահները հեռացել են երկկողմ փակ բանակցությունների։
