– Մեր այսօրվա հավաքի նպատակը ոչ թե հերթական քաղաքական հայտարարություն անելն է, այլ մեր խնդիրների խորքային ախտորոշումը եւ դրանց լուծման համակարգային տեսլականի ներկայացումը,- այսօր լրագրողների հետ հանդիպման ժամանակ հայտարարեց ՆԺԱՐ Սահմանադրական շարժման հիմնադիրներից՝ ձեռնարկատեր Արտաշես Իկոնոմովը:
Նրա խոսքով, իրենք արձանագրում են, որ ՀՀ-ում ոչ միայն կառավարման, այլեւ իրավական, սահմանադրական կարգի համակարգային քայքայման գործընթաց է, ու այդ ճգնաժամի արմատներն ավելի խորն են, քան վերջին 30 տարին. «Դրանք պայմանավորված են պետականության հիմքում իսկական ազգային ինքնորոշման բացակայությամբ: Անկախությունից ի վեր իրավունքի գերակայությունը զոհաբերվել է քաղաքական նպատակահարմարությանը, իսկ սահմանադրությունները դիտարկվել են որպես գործիք իշխանության պահպանման համար»:
Կարդացեք նաև
Նա նաեւ վստահեցրեց՝ գալիս են ոչ թե բաժանելու, այլ միավորելու, ոչ թե վրեժխնդրության, այլ արդարության հաստատման ու իրենց նպատակն է մարդու ազատության, պատասխանատվության եւ արժանապատվության վրա հիմնված պետություն կերտելը. «Մենք մշակել ենք կոնկրետ ինստիտուցիոնալ ճարտարապետություն, որը ներառում է պետական խորհուրդ, ինքնորոշման ինստիտուտ եւ այլ կառույցներ, որոնք կդառնան նոր պետության կմախքը»:
Մեր պետության խնդիրն, ըստ Իկոնոմովի, գալիս են դեռ «Միացում» շարժման հիմնադրումից. «Այնտեղ մարդիկ էին կանգնած, գաղափարներ կրող մարդիկ, ինտելիգենտ, բայց չէին կայացել որպես էլիտա: Ամենամեծ խնդիրը դա է, երբ քաղաքացին ինքնորոշված չէ՝ չի կարողանում համահունչ միանալ ու կազմել ինքնորոշված հասարակություն, միայն ինքնորոշված հասարակությունը կարող է ունենալ էլիտա»:
Իկոնոմովի պատմական ակնարկը հասավ նաեւ առաջին նախագահական ընտրություններին, ընտրակեղծիքներին. «Փաստորեն այդ ժամանակ սկսվեց Արցախի կորուստը, մենք ոչ թե կորցրինք հենց 2020-ին, երբ Նիկոլը վերջին մեխը խփեց դրա մեջ, այլ իրականում Արցախի կորուստը սկսվեց 1996 թվականից, որովհետեւ այն արժեքները, որոնք պետք է լինեին ժողովրդավարական պետության մեջ, սկսեցին խարխլվել»:
Արփինե ՍԻՄՈՆՅԱՆ
