-Ամեն ասուլիսից կամ ամեն հանդիպումից հետո Նիկոլ Փաշինյանը պնդում է, որ ապրում ենք նոր միջավայրում, բայց չեմ կարծում՝ մեր հայրենակիցները դրական, շոշափելի կամ իրենց առնվազն արժանապատվությունը նվաստացած չեն զգում,- այսօր լրագրողների հետ հանդիպման ժամանակ ասաց նորաստեղծ ՆԺԱՐ շարժման հիմնադիրներից Նինա Կարապետյանցը:
Անդրադառնալով Նիկոլ Փաշինյանի երեկվա ուղերձին, որում պնդում էր, թե խաղաղություն չէր կարող լինել առանց Ղարաբաղի հարցի փակման, տիկին Կարապետյանցը շարունակեց. «Արցախի հետ կապված հարցը մեր համաձայնելու կամ չհամաձայնելու հետ չի կապված: Արցախցիներն ունեն միջազգայնորեն ճանաչված իրավունքներ եւ այդ իրավունքների հետ կապված որոշումները կայացնելու են արցախցիները: Չենք կարող ասել՝ այն բոլոր միջազգային կոնվենցիաները, այն բոլոր լուծումները, կարգավորումներն ու սկզբունքները, օրինակ` բնիկ ժողովուրդների իրենց հայրենիքում ապրելու իրավունքը վերաբերում է բոլորին, բացի արցախցիներից, ցեղասպանության չենթարկվելու կոնվենցիան վերաբերում է բոլորին, բացի արցախցիներից: Չգիտեմ այդպիսի կոնվենցիա, որ այդպիսի կարգավորումներ ունի: Արցախցիների հարցը մի հոգի չէ, որ կարող է բացել կամ փակել»:
Կարդացեք նաև
ՆԺԱՐ-ի մյուս հիմնադիրներից Արտաշես Իկոնոմովն էլ Փաշինյանի ուղերձին անդրադառնալով՝ շարունակեց տիկին Կարապետյանցին. «Ինչ ասում է, իր հերթական ստերից է: Նախաստորագրություններով խաղաղություն չի լինում: Մենք առաջիններից ենք կողմ խաղաղությանը ու մեր հարեւանների հետ ներդաշնակ լինելուն, բայց դա չի կարող լինել արժանապատվության հաշվին: Պետք է դիվանագիտական ճիշտ աշխատանք կատարվի, ոչ թե թաքուն պայմանավորվեն, ու չհասկանանք՝ ինչ է լինելու… մինչեւ ընտրությունները պարոն Փաշինյանը շատ արհավիրքներ կարող է բերել մեր գլխին՝ ըստ իր ապրելակերպի ու ըստ իր բնավորության: Բայց մենք պատրաստ ենք ամեն ինչին »:
Արփինե ՍԻՄՈՆՅԱՆ
