Այսօր նախարար Համբարձում Մաթևոսյանի նախագահությամբ կայացավ «Սևանի իշխանի պաշարների վերականգնման և ձկնաբուծության զարգացման հիմնադրամի» հոգաբարձուների խորհրդի նիստը։
Նիստին մասնակցում էին Գեղարքունիքի մարզպետ Կարեն Սարգսյանը, նախարարի տեղակալներ Արամ Մեյմարյանը, Արա Մկրտչյանը, նախարարության գլխավոր քարտուղար Սերգո Աթանեսյանը, ինչպես նաև շահագրգիռ գերատեսչությունների ներկայացուցիչներ՝ խորհրդի անդամների կազմով։
Նախարար Մաթևոսյանը, որպես խորհրդի նախագահ, հիշեցրեց, որ նաև նախկինում՝ փոխվարչապետի կարգավիճակում, ղեկավարել է այս կառույցի աշխատանքները և խորությամբ ծանոթ է հիմնադրամում առկա խնդիրներին։ Այդ պատճառով նիստի ընթացքում առանձնակի ուշադրություն է դրվել գույքագրված խնդիրների լուծման և հիմնադրամի առողջացման օրակարգին։
✅ Քննարկումների արդյունքում ընդունվել են կոնկրետ որոշումներ՝ ուղղված կուտակված խնդիրների հաղթահարմանը և հիմնադրամի արդյունավետ գործունեության ապահովմանը։
Կենսաբազմազանության պահպանման և էկոլոգիական հավասարակշռության տեսանկյունից Սևանի իշխանի պաշարների վերականգնումը նախարար Մաթևոսյանը կարևորել է որպես առաջնային խնդիր։ Սա ոչ միայն բնապահպանական, այլև ռազմավարական նշանակություն ունի՝ Սևանի էկոհամակարգի կայունության և ձկնաբուծության զարգացման տեսանկյունից։
ՀՀ շրջակա միջավայրի նախարարություն
