Բուլղարիայի Սամոկով քաղաքում ընթացող հունահռոմեական ոճի ըմբշամարտի Մ 20 աշխարհի առաջնությունում Հայաստանն արդեն երկու մեդալ նվաճել է: Այսօր չեմպիոնի կոչման արժանացել է 72 կգ քաշային Գասպար Տերտերյանը, որը համառ գոտեմարտում պարտության է մատնել ուզբեկ Ահմադ Կոդիրովին: Նախորդ օրը մեր հավաքականին արծաթե մեդալ պարգեւել էր 60 կգ քաշային Յուրիկ Մխիթարյանը:
Հայաստանի մեդալները կարող են ավելանալ եւս երկուսով: Մեկը՝ անկասկած, որովհետեւ Ալեքս Մարգարյանը 63 կգ քաշային կարգում մտել է եզրափակիչ եւ ապահովել առնվազն արծաթ: Սակայն նա վաղը չեմպիոնության համար գոտեմարտելու է կրկին Ուզբեկստանի ներկայացուցչի՝ Այթջան Խալմախանովի հետ: Իսկ ահա Էրիկ Տեր-Մաթեւոսյանը դեռ պետք է հաղթահարի սփոփիչ գոտեմարտի արգելքը եւ ապա միայն հավակնի բրոնզի:
Աշոտ ՀԱԿՈԲՅԱՆ
