Սոցցանցերում տարբեր մեկնաբանություններ կան Հայոց Ցեղասպանության հուշահամալիրում, Ծիծեռնակաբերդում կատարվող շինարարական աշխատանքների վերաբերյալ:
Շատերի համար տարակուսելի է, որ այդ աշխատանքները հիմա են մեկնարկել, երբ իշխանությունները խոսում են Ադրբեջանի հետ խաղաղությունից, ճանապարհների ապաշրջափակումից, իսկ Նիկոլ Փաշինյանը՝ Ցեղասպանության պատճառները հասկանալուց:
Կարդացեք նաև
Aravot.am-ը Ծիծեռնակաբերդում շինարարական աշխատանքների վերաբերյալ մեկնաբանություն է խնդրել Հայոց Ցեղասպանության թանգարան ինստիտուտի տնօրեն Էդիտա Գզոյանից:
«Այդ աշխատանքները վաղուց են սկսվել, մենք դրա մասին պարբերաբար տեղեկացրել էինք: Մոտ երկու ամիս է՝ աշխատանքներն ընթանում են, հիմնանորոգման եւ ջրահեռացման համակարգի կառուցման աշխատանքներ են իրականացվում:
Երբ հուշահամալիրն ու թանգարանը կառուցել են, ջրահեռացման համակարգ չի կառուցվել, պարբերաբար խնդիր ենք ունեցել: Վարչական շենքի տանիքից ջուրը ներս էր լցվում, երբ անձրեւ էր գալիս, նաեւ անձրեւաջրերը այս ամբողջ տարիների ընթացքում հուշահամալիրից ներս են լցվել, քանի որ չի եղել ջրահեռացման համակարգ: Անվտանգության խնդիր էր առաջացել, որովհետեւ բազալտի քարերը արդեն սկսել էին տեղաշարժվել, ջուրը ներսում հավաքվել էր ու սկսել էր քարերը դուրս հրել:
Ճարտարապետ Սաշուր Քալաշյանն է աշխատանքները ղեկավարում: Այս պահին, որպեսզի մույթերը չփակվեն, ողջ համալիրը չփակվի, եւ մարդիկ մուտք ունենան, իրենք երկուական մույթերով հանում են բազալտի քարերը, ջրահեռացման համակարգ են անցկացնում ու նոր բազալտի քարեր են դնում վրան: Ինչպես արդեն նշեցի, որպեսզի ամբողջ հուշահամալիրը չփակվի, աստիճանաբար են իրականացվում աշխատանքները, հետեւաբար դա կարող է երկար տեւել»,-պարզաբանեց Հայոց Ցեղասպանության թանգարան ինստիտուտի տնօրենը:
Գոհար ՀԱԿՈԲՅԱՆ
