Լրահոս
Օրվա լրահոսը

ՌԴ Նախոդկա քաղաքում օծվեց նոր հայկական եկեղեցի

Օգոստոս 25,2025 22:11

Օգոստոսի 24-ին Ռուսաստանի և Նոր Նախիջևանի հայոց թեմի առաջնորդ, Գերաշնորհ Տեր Եզրաս արքեպիսկոպոս Ներսիսյանի ձեռամբ ՌԴ Նախոդկա քաղաքում օծվեց նորակառույց հայկական եկեղեցի։

Հանդիսավոր արարողությանը ներկա էին քաղաքային իշխանության ներկայացուցիչներ, Ռուս Ուղղափառ Եկեղեցու եպիսկոպոս Նիկոլայ Դուտկան, ՌԴ տարբեր քաղաքներից ժամանած հայեր, ինչպես նաև ուխտավորներ Հայաստանից։

Նորակառույց եկեղեցին անվանակոչվեց Սուրբ Հարություն և առաջիկայում ծառայելու է Նախոդկայում ապրող շուրջ երկու հազար հայերի հոգևոր կարիքներին։

Տաճարը կառուցվել է Հայաստանից բերված վարդագույն տուֆով, ունի 24 մետր բարձրություն և առանձնանում է ճարտարապետական գեղեցկությամբ։

Օծման ավարտին թեմակալ առաջնորդը օրհնության գիր շնորհեց բարերար Սամվել Ավետիսյանին։ Գնահատանքի խոսք հղվեց նաև Ավետիսյան եղբայրներին՝ եկեղեցու կառուցման բարեպաշտ նախաձեռնության համար։ Օրհնության գրով պարգևատրվեց «Ակունք» հասարակական կազմակերպության ղեկավար, բարերար Արթուր Թադևոսյանը՝ եկեղեցուն կից կիրակնօրյա դպրոց և մշակութային կենտրոն կառուցելու համար։

Ներկաներին շնորհավորեց նաև քաղաքապետ Թիմուր Մագինսկին՝ ընդգծելով, որ հայ համայնքը իր հարուստ մշակութային ավանդույթներով մեծապես նպաստում է Նախոդկա քաղաքի բարգավաճմանը։

Նախոդկայի նորակառույց եկեղեցին Հեռավոր Արևելքի երկրորդ հայկական եկեղեցին է։ Առաջինը կառուցվել է մեկ դար առաջ՝ 1906 թվականին, Վլադիվոստոկում։

Ռուսաստանի և Նոր Նախիջևանի հայոց թեմի մամլո դիվան

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Օգոստոս 2025
Երկ Երե Չոր Հնգ Ուրբ Շաբ Կիր
« Հուլ    
 123
45678910
11121314151617
18192021222324
25262728293031