«Ապրելու երկիր» կուսակցության համահիմնադիր Մեսրոպ Առաքելյանը «Հայելի» ակումբում անդրադառնալով իշխանության գովազդած խաղաղության մասին՝ արձանագրեց, որ խաղաղության համար, ակնհայտ է, պետք է ունենանք ուժեղ պետություն, ուժեղ տնտեսություն՝ ուժեղ բանակով, ուժեղ դիվանագիտությամբ, ինչը այս իշխանության օրոք բացառված է, որ այս իշխանությունն ընդամենը սպասարկում է Ադրբեջանի շահերը եւ անընդհատ գնում է զիջումների:
Նիկոլ Փաշինյանի հայտարարության մասին, թե 2026 թվականին պետք է ընտրություն կատարել խաղաղության եւ ոչ խաղաղության միջեւ, քաղաքական գործիչն ասաց. «2026-ին պետք է ընտրություն կատարենք խաղաղության եւ Նիկոլ Փաշինյանի կեղծ, խարխուլ խաղաղության միջեւ: Խաղաղությանն այլընտրանք չկա, ժողովուրդն ամեն ինչ անում է խաղաղության համար: Ոչ խաղաղություն թեզը հենց Նիկոլ Փաշինյանն է: 2021 թվականից հետո միայն Նիկոլ Փաշինյանի օրոք են բերվում ռազմական գործողություններ, զոհեր, բռնի տեղահանվածներ: Ոչ խաղաղությունը էլ ինչպե՞ս պետք է լինի:
Եկեք հասկանանք, թե Վաշինգտոնում ինչ տեղի ունեցավ: Շոու, որ բերեցին, գցեցին՝ պատմական օր: Քիչ է մնում տոն դարձնեն, ոչ աշխատանքային օր, չնայած, իրենք երբ են աշխատել որ մի հատ էլ այդ օրը չաշխատեն: Տեսան, որ դա էլ էֆեկտ չտվեց, հասարակությունը իներտ էր: Դրանից հետո տեղի ունեցավ հայտնի ուղերձը: Այդ ուղերձն էլ որեւէ ազդեցություն չունեցավ: Հետո տեղի ունեցավ մեկ այլ «պատմական իրադարձություն». Նիկոլ Փաշինյանը կառավարության նիստից հետո իջավ լրագրողների մոտ եւ առաջին անգամ, այսպես կոչված, անակնկալ ասուլիս արեց: Դրա նպատակը էլի օգոստոսի 8-ի քարոզչության շարունակում էր:
Եթե հասարակությունն այդ ամեն ինչը ցնծությամբ ընդունել է, էլ ի՞նչ իմաստ ունի ամեն օր դրա մասին խոսել: Ակնհայտ է, որ հասարակությունը չի ընկալում այդ օգոստոսի 8-ը, որ վերջնական ամեն ինչ ավարտվել է: Մեր հասարակության խնդիրը Ադրբեջանն է, ոչ թե փաստաթուղթը: Այդ փաստաթուղթը ստորագրվել է, երբ մեր 23 հայրենակիցներ Ադրբեջանի բանտում են: Որեւէ բանական մարդ չի մտածում, որ Ադրբեջանը ուզում է խաղաղություն:
Կարդացեք նաև
Գերիների առկայության նպատակը ո՞րն է: Եթե Ադրբեջանը գնում է խաղաղության, նորմալ, բարիդրացիական, դիվանագիտական հարաբերությունների, ի՞նչ է տեղի ունենալու: Հայաստանից այդ ՔՊ-ականներից մեկը պատրաստվում է առաջիկա ամիսներին գնալ Բաքու, դեսպան աշխատել, երբ մի քանի հարյուր մետր այն կողմ տանջվում են մեր գերիները: Դա է՞ խաղաղությունը: Սա ուղղակի մարազմ է»,-ասաց Մեսրոպ Առաքելյանը:
Աշոտ ՀԱԿՈԲՅԱՆ
