Վաշինգտոնում խաղաղության փաստաթղթի նախաստորագրումից հետո Նիկոլ Փաշինյանի եւ նրա թիմի կողմից ինտենսիվորեն տարածվող թեզերը, թե Հայաստանը եւ հայ ժողովուրդը երբեք այսքան խաղաղ ժամանակաշրջանում չեն ապրել, դարձել է լայն քննարկման թեմա, որին «Հայելի» ակումբում անդրադարձել է նաեւ հոգեբան Կարինե Նալչաջյանը:
«Իրենք վստահության ամբողջ ռեսուրսը սպառել են: Մարդիկ իրենց չեն հավատում, ու իրենց դեմքը մարդկանց ամենատարբեր շերտերի ներկայացուցիչների համար արդեն պարզ է: Բայց բոլոր դեպքերում իրենց ձեռքում կան լծակներ, պետությունը իր բոլոր օղակներով, փաստորեն, իրենց ձեռքին է: Եվ փորձում են խաբեությամբ հասարակությանը գցել մոլորության մեջ: Մի տեսակ ժամանակ են շահում իրենց սեւ գործը մինչեւ վերջին կաթիլը տանելու համար:
Երբ ամուսինները այդպես հանգիստ զբոսնում են Երեւանում, մարդիկ շատ լավ գիտեն, որ փողոցները փակված են, որ այդ ամենը բեմադրություն է: Մարդկանց արդեն դրանով չես խաբի: Բայց բոլոր դեպքերում դա թեմա է դառնում: Մարդիկ նայում են, խոսում են, թե այդ ժամանակ Նիկոլը եւ իր թիմակիցները մեր թիկունքի հետեւում ում հետ ինչ են խոսում, ինչ են պայմանավորվում: Դա մեզ համար բացարձակապես փակ է: Իրենք զբաղեցնում են եւ այդ զբաղեցնելու հետ մեկտեղ նաեւ անում են բաներ, որոնք շատ նվաստացուցիչ են:
Օրինակ, այդ կերպարով, որ դուրս են գալիս Երեւանի փողոցներ, նայում, մտածում ես, որ սա է քո երկրի ղեկավարը այդ պահվածքով, այդ կերպարով, արդեն քեզ նվաստացած ես զգում, որովհետեւ հենց դրսից եթե ծիծաղում են իր վրա, նաեւ մեր վրա են ծիծաղում: Այսինքն, ով ուզում է լինի քո երկրի ղեկավարը, ինչ վերաբերմունք կա նրա նկատմամբ, դա նաեւ մեզ է վերաբերում:
Կարդացեք նաև
Ամեն անգամ, երբ Նիկոլի հասցեին ինչ-որ մի ծաղր է հնչում դրսից, հասկանում ենք, թե ով է Նիկոլը, որ ինքն անձամբ դրան արժանի է: Բայց քանի որ սա մեր երկիրն է ներկայացնում, մի տեսակ, գետինն ես մտնում, որ քո հայրենիքի, քո երկրի առաջին համար ներկայացուցիչը սա է: Նվաստացում, նվաստացում, նվաստացում:
Մարդիկ հասկանում են, որ այս պահին խանութները դեռ գուցե լիքն են, սրճարանները դեռ աշխատում են: Երեւանը, Հայաստանը հրաշք են, եւ մարդիկ ուզում են անհոգ ապրել: Բայց տեսնում են, որ առջեւում անդունդ է, հասկանում են, որ այն, ինչ կատարվում է, կարող է փոփոխությունը ժամերի մեջ տեղի ունենալ»,-ասաց բանախոսը:
Որ մարդիկ, կարծես, անհոգ են, սրճարաններում նստած են, իրենց համար զբոսնում են, հոգեբանը դատապարտելի չի համարում: «Մարդն ապրում է իր առօրյա կյանքով եւ ինքը կարող է իր համար հաճելի, իր սիրելի մարդկանց հետ նաեւ նստել սրճարանում: Բայց ո՞վ կարող է ասել, թե ինչ կա այդ մարդկանց մտքում, ո՞վ է ասել, թե այդ մարդիկ հավատում են այս խեղկատակությանը: Այդպես չէ: Տրամադրությունները կտրուկ փոփոխված են: Մենք չենք կարող մարդկանց ստիպել, որ առավոտից իրիկուն նստեն ու ողբան:
Այս իշխանությունը ոչինչ չի ստեղծել, բայց ունի մի առանձնահատկություն՝ ուրիշի ստեղծածը իրեն վերագրելը: Երկիրը, որում գտնվում է Հյուսիսային պողոտան հիմա իր թաթերի մեջ է, ինքը համարում է իրենը: Թուրքի բնավորության մի յուրահատուկ բան կա. Ուրիշինը համարել իրենը: Վերջերս Ալիեւը ասում էր չէ՞, որ Մոսկվան, թե Կրեմլը ադրբեջանցի մի ճարտարապետ է կառուցել: Թուրքի բնավորության, բարոյականության մակարդակի շատ ցածր մակարդակն է, որ ուրիշի ստեղծածը վայելում է՝ այդ ուրիշ մեկին վարկաբեկելով, նվաստացնելով:
Եվ իրենց գործողություններին, արածներին, արտահայտած մտքերին որ հետեւում ես, դասական օրինակ է՝ բարոյազուրկ մտքի, բարոյազուրկ վարքի: Ավելի վառ օրինակ դժվար է պատկերացնել: Իրենք արդեն բաց իրենց դեմքը ցույց են տալիս: Արդեն չեն ասում խոնարհվում ենք, չեն ասում ձեր թիկունքի հետեւում ոչ մի բան չի ստորագրվելու: Իրենք արդեն իրենց թիկունքը պինդ են զգում, իրենց պաշտպանված են զգում: Այն, որ ցինիկաբար ասում է՝ չէք հավանում, հեղափոխություն արեք, ցինիզմի գագաթնակետն է»,-ասաց Կարինե Նալչաջյանը:
Աշոտ ՀԱԿՈԲՅԱՆ
