ԱՄՆ նախագահ Դոնալդ Թրամփն իսկապես արժանի է խաղաղության նոբելյան մրցանակի։ Այս մասին «Ալ Արաբիա»-ին տված հարցազրույցում ասել է Ադրբեջանի նախագահ Իլհամ Ալիևը՝ հիշեցնելով, որ «ՀՀ վարչապետ Նիկոլ Փաշինյանի հետ միասին առաջարկել է Թրամփի թեկնածությունը՝ խաղաղության նոբելյան մրցանակի»։
«Ինչպես Վաշինգտոնում իմ մեկնաբանություններում ասացի՝ նա մի քանի ամսվա ընթացքում հրաշք է գործել Աֆրիկայում, Ասիայում, Հարավային Կովկասում։ Եվ սա նրա բնավորության մեջ է։ Սա նրա բնույթն է։ Նա խաղաղություն է ուզում։
Նա այնպիսի մարդ է, որը բացարձակապես չի համապատասխանում արևմտյան առաջնորդի ավանդական կերպարին։ Նա շատ բարյացակամ է։ Շատ առատաձեռն։ Նա այնքան առատաձեռն էր, որ իր բոլոր նվերները բաժանեց, նույնիսկ ավելին, քան նախատեսված էր։
Նա իսկապես այնպիսի մարդ է, որը իսկապես մեծ հարգանքի է արժանի։ Սա իմ առաջին հանդիպումն էր նրա հետ, բայց նրա նկատմամբ իմ վերաբերմունքը՝ որպես քաղաքական գործչի, միշտ դրական է եղել։ Նույնիսկ Թրամփի առաջին ժամկետի ընթացքում», – ասել է Իլհամ Ալիևը և հավելել, որ այդ ժամանակ ինքը հնարավորություն չի ունեցել նրա հետ հանդիպելու:
Կարդացեք նաև
«Հատկապես, երբ նա զրկվեց վերընտրվելու հնարավորությունից՝ «խորքային պետության» ներկայացուցիչների կողմից իրականացված ընտրակեղծիքների արդյունքում։ Նրանք գողացան նրա հաղթանակը։ Եվ այն, ինչ պարոն Թրամփն ասում է փոստով քվեարկելու պրակտիկան վերացնելու մասին, բացարձակապես ճիշտ է։
Գիտեք, ամերիկյան վարչակազմերը միշտ սիրում են սովորեցնել ամբողջ աշխարհին, թե ինչպես ապրել, ինչպես ժողովրդավարություն կառուցել, ինչպես ընտրություններ անցկացնել և այլն։ Մենք բոլորս շատ լավ գիտենք սա։ Բայց հենց իրենք են կատարել նախագահ Թրամփի դեմ ամենամեծ ընտրակեղծիքը՝ հաղթանակից զրկելով նրան։ Եվ այն ժամանակահատվածում, երբ պարոն Թրամփը նախագահ չէր, նա իրեն շատ պարկեշտ պահեց։
Թրամփը մեծ քաջություն և արժանապատվություն ցուցաբերեց՝ վերադառնալով Ամերիկա, որտեղ նրա դեմ էին այդ բոլոր «ճահճի մեջ գտնվող գորտերը», ինչպիսիք են ԱՄՆ Միջազգային զարգացման գործակալությունը (USAID), «Ազատություն» ռադիոկայանը, կեղծ լուրեր արտադրողները, այդ թվում՝ «Վաշինգտոն փոստը», «Նյու Յորք թայմսը», «Ուոլ Սթրիթ ջորնըլը», «Նյուզուիքը»։
Նրանք բոլորը Թրամփին դիվականացրին, ինչպես օրինակ՝ ինձ էին դիվականացնում, գուցե ոչ նույն մակարդակով, բայց նույն ձևով՝ լուրեր տարածելով», – հայտարարել է Ադրբեջանի նախագահը։
