Գարեգին Բ Հայրապետի ոգեկերտման նշանակալի ձեռնարկներից է նաև բարեսիրության ոգու վերարթնացումը մեր ժողովրդի զավակների սրտում ի Հայաստան և ի սփյուռս աշխարհի: 1988-ի երկրաշարժը, Արցախյան ազատագրական պայքարը, նորանկախ Հայաստանի առաջ ծառացած մարտահրավերները ժողովրդի կյանքում ուղեկցվում էին երկրի տնտեսության համար սոցիալապես ծանր ցնցումներով՝ ի հայտ բերելով գործազրկություն, աղքատություն և արտագաղթ…
Հայոց Եկեղեցու հայրապետներն ու վարդապետները բոլոր ժամանակներում էլ քաջալերել են մերձավորի հանդեպ կարեկցանքը՝ սերը, գութը և ողորմությունը հռչակելով առավել շահավետ և օգտակար, քան վարձատրության արժանի բոլոր առաքինությունները… Ահավասիկ այս մտայնության վերարծարծմանն էին ուղղված հայ սրտի անդաստանում բարեսիրության հունդերը սերմանելու Գարեգին Բ-ի անդուլ ջանքերը:
Դեռևս Արարատյան հայրապետական թեմի առաջնորդական փոխանորդ եղած շրջանից ապագա Հայրապետը ՀԲԸՄ-ի աջակցությամբ հայորդյաց տների հովանու ներքո սկիզբ է դնում բարեգործական ճաշարան կոչված հաստատության գործունեությանը, որտեղ ամենօրյա սնունդ էին ստանում անապահով, սոցիալապես խոցելի խմբերի ներկայացուցիչները՝ ծերեր, միայնակներ, աղքատներ։
Այսօր արդեն բարեգործական ճաշարանների մի ողջ ցանց է գործում Հայաստանի Հանրապետությունով մեկ, որոնք սնունդ են մատակարարում հազարավոր կարիքավորների: Հայրապետի տեսլականն է, որ Հայաստանի յուրաքանչյուր քաղաք ապահովված լինի նման ճաշարանով, որպեսզի, անհրաժեշտության դեպքում, մեր ժողովրդի որևէ զավակ անտեսված չլինի համապատասխան ուշադրությունից, խնամքից:
Անապահովների հոգածությանը զուգահեռ Գարեգին Բ Հայրապետը մեծ կարևորություն է տալիս նաև խնամքի կարոտ երեխաների կրթության և դաստիարակության գործին: Այսօր Մայր Աթոռ Ս. Էջմիածնի հովանու ներքո գործում են խնամքի երկու՝ Քյուրքչյան և Նագաշյան մանուկների տուն երեխաների աջակցության կենտրոնները: Հայրապետի բարեսիարական աստվածահաճո ձեռնարկների շարքում իր արժանի տեղն է գրավում նաև 2006 թվականին մեկնարկած «Ն. Ս. Օ. Տ. Տ. Գարեգին Բ. կառուցենք հավատով» տնաշինական ծրագիրը: Այն նախատեսում էր 3 տարվա ընթացքում, աշխարհասփյուռ հայոց թեմերի թվին համազոր, տարին 37 տուն կառուցել՝ Հայաստանի տարբեր մարզերում տնազուրկ և կարիքավոր ընտանիքների համար:
Կարդացեք նաև
Այս ծրագրի իրականացումը բնականաբար հայ հասարակության ընկալումներում ընդարձակեց բարեսիրության սահմանները՝ ուշադրություն հրավիրելով կարիքավոր ընտանիքներին բնակարանով ապահովելու անհրաժեշտության վրա: Շատ կազմակերպություններ և անհատ բարերարներ, խանդավառված այս գաղափարով, իրենց բարեգործական ծրագրերում սկսեցին կարևորել այս հիմնախնդիրը նույնպես:
Աղետի գոտի… 1988 թվականի ավերիչ երկրաշարժն իր անջնջելի հետքն է թողել այսօրվա մեր հասարակության վրա, կարելի է անգամ պնդել, որ դեռևս լիարժեքորեն չենք ազատվել աղետի գոտի ունենալու բարդույթից: Ուրախությամբ պետք է արձանագրենք, որ Գարեգին Բ Հայրապետի բարեսիրական գործունեությունը չի շրջանցել նաև հատուկ հոգածության կարիք ունեցող աղետի գոտու բնակիչներին: Հայրապետի անմիջական նախաձեռնությամբ մեկ տասնյակը գերազանցող բնակարաններ են նվիրաբերվել 1988-ի ավերիչ երկրաշարժից տուժածներին: Ավելին՝ Գարեգին Բ Հայրապետը Լուսավորչի գահին բազմելուն պես իր անմիջական ուշադրության ներքո առավ աղետի գոտի հանդիսացող Շիրակի և Գուգարաց թեմերը: Պատահական չէ, որ առաջինն այս տարածաշրջաններում հիմնվեցին հայորդյաց տներ և բարեգործական ճաշարաններ…
Ակնհայտորեն Հովվապետի հոգածու հայացքի ներքո հասարակության բոլոր խոցելի խմբերն են: Եվ Գարեգին Բ Հայրապետի ջանքերով սկսված բարեսիրության մշակույթի զարգացումը անմիջական արձագանքն է Դ դարում Ներսես Մեծ (353—373) Հայրապետով Հայոց Եկեղեցում սկզբնավովրած մարդասիրական ավանդույթների:
Բարեսիրության ոգու վերակերտումը, սակայն, Գարեգին Բ Հայրապետի մտահորիզոնում չսահմանափակվեց զուտ բարեգործական ճաշարանով և մանուկների խնամքի կենտրոններով, կարիքավորներին բնակարանով ապահովելու ծրագրով: 2013 թ. Մայր Աթոռ Ս. Էջմիածնում Վեհափառը հիմնում է Սոցիալական ծառայության կենտրոնը:
Այս կենտրոնի առաքելությունն է հասնել ամենուր բոլոր տեսակի կարոտյալներին՝ աղքատին, հիվանդին, կարիքի մեջ հայտնվածին: Մի խոսքով՝ բոլոր նրանց, ովքեր օգնության ակնկալիք ունեն: Այս համատեքստում չենք կարող չանդրադառնալ, որ 2020 թ. համավարակին ինչ կարևոր ներդրում ունեցավ Մայր Աթոռի սոցիալական ծառայության կենտրոնը՝ պետության կյանքում ստեղծված դժվարությունը հաղթահարելու առումով: Այսօր էլ իր Հովվապետի կոչին ընդառաջ՝ Մայր Աթոռ Ս.
Էջմիածնի թեմերն ի Հայաստան և ի սփյուռս աշխարհի շարունակում են իրենց օժանդակությունը ցուցաբերել հայրենի իշխանություններին, մեր ժողովրդի զավակներին:
Հայրապետի կողմից ազգային կյանքում իրականացվող բարեսիրական միջոցառումների ցանկը կարելի է երկարացնել: Այստեղ մասնավորապես կուզենայի հիշատակել Արցախում և Հայաստանի սահմաններում թշնամու գնդակից վիրավորված հայ զինվորի հանդեպ Հայրապետի կողմից ցուցաբերվող վերաբերմունքի մասին: Վեհափառի միջնորդությամբ շատ զինվորականներ են արտասահմանյան տարբեր երկրներում բուժում ստացել, վերադարձել կյանքի բնականոն հունին։
Հատված Տ. Գևորգ եպիսկոպոս Սարոյանի «Ոգու շինարարը» հոդվածից
Քրիստոնյա Հայաստան երկշաբաթաթերթ, 2021թ. նոյեմբեր
Մասյացոտնի թեմ
