«Արդեն ակնհայտ է, որ քաղբանտարկյալ եզրույթն ավելի ընդգրկուն է, քան պարզապես Հայաստանի բանտերում նստած մարդկանց քանակն է։ Նույն քաղբանտարկյալների շարքում են նաեւ Բաքվում որպես պատանդ գտնվող հայ ռազմագերիները եւ Արցախի ռազմաքաղաքական ղեկավարությունը։ Ակնհայտ է, որ դա նույն խնդիրն է, ուղղակի կալանավորների մի մասը Բաքվում է, մի մասը Հայաստանում է։ Այսինքն՝ երեւի առաջին անգամ մեր պատմության մեջ մենք ունենք այսպիսի համատեղ քաղկալանավորների խումբ, որոնց կալանավորումը պայմանավորված է նույն բանով՝ Ալիեւի ձեռամբ դա արվում է հայ զինվորների եւ Արցախի ռազմաքաղաքական ղեկավարության հանդեպ, Նիկոլի ձեռամբ դա արվում է Հայաստանի քաղաքական, հոգեւոր, հասարակական գործիչների հանդեպ»,- Այս մասին «Հայելի» ակումբում ասաց ՀՀԿ փոխնախագահ Արմեն Աշոտյանը։
Նա նշեց, որ Նիկոլ Փաշինյանը խոստովանեց այն, ինչ ՀՀԿ-ն ասում էր՝ 44-օրյա պատերազմը սարքած էր, բերված էր Հայաստան, գծած պատերազմ էր, գծած էր անգամ այն փաստը, որ հայ զինվորները պետք է մի տեղ կուտակվեն եւ մնան անպաշտպան, իսկ ադրբեջանական օդուժը պետք է ռմբակոծի։ Եվ այդ տեսանյութերը պետք է տարածվեին Հայաստանում, որպեսզի սարսափ, ցավ ու վախ առաջացնեին։ «Այդ պատերազմի իմաստը ոչ միայն դավաճանական գործողությունների արդյունքում Արցախի հանձնումն էր, ոչ միայն զոհերի քանակն էր, այս պատերազմի խնդիրն էր նաեւ վախեցնել հայ ժողովրդին այն աստիճանի, որ նա այլեւս շատ երկար ժամանակ չուզենա պայքարել իր անկախության, արժանապատվության եւ իր հայրենիքի համար։ Եվ Նիկոլը, քանզի մնացել է անպատիժ, բաց խաղաքարտերով դուրս է եկել խաղադաշտ եւ խոստովանում է, որ միտումնավոր տապալել է բանակցային գործընթացը։ Անկախության օրվա ուղերձում նա խոստովանում է, որ միտումնավոր տապալել է բանակցային գործընթացը»,- ասաց Աշոտյանը։
Անդրադառնալով Վաշինգտոնում ձեռք բերված պայմանավորվածություններին՝ Արմեն Աշոտյանն ասաց․ «Ողջ հարգանքով ԱՄՆ նկատմամբ՝ որպես գերտերություն եւ ԱՄՆ նախագահի խաղաղասիրական ջանքերի նկատմամբ, Թրամփի նկարը սրբապատկեր չէ։ Այսինքն՝ մտածել, որ Թրամփի հետ նկարը կարող է խաղաղություն բերել․․․ Կներեք, Աստվածածնի նկարը չէ, Քրիստոսի մասունք չէ, նկար է, որից, ի դեպ, Թրամփը, մակագրելով եւ Ալիեւին համարելով որպես իր լավ բարեկամ, մի հատ այդպիսի մասունք ուղարկել է Բաքու։
Իսկ ի՞նչ է ուղարկել Բաքու, եթե Հայաստանը Թրամփի համար Ալբանիա է, չեմ զարմանա, եթե Նիկոլի անունն էլ սխալ արտասանի, ասի, օրինակ, Կիկոլ։ Սա նորմալ է, ոչ մեկը չի հարգում մարդկանց, ովքեր պատրաստ են վաճառել հայրենիքը։ Իսկ Թրամփը բիզնեսմեն է եւ շատ լավ գիտի եւ Հայաստանի գինը, եւ արժեքը։ Վստահ եմ՝ շատ զարմացած է այն փաստից, թե Նիկոլ Փաշինյանն առհասարակ ինչու է պատրաստ եղել վաճառել հայրենիքը եւ վաճառել է այն այնպիսի էժան գնով»։
Կարդացեք նաև
Աշոտյանը նա ասաց, որ ԱՄՆ պետդեպի պաշտոնական կայքում գրված է, թե ինչ է նշանակում ամերիկյան դիվանագիտության մեջ ինչ-որ գործընթացի վկա լինելը։ Գրված է, որ պայմանագիր ստորագրելուց վկա լինելը չի նշանակում,որ վկան, այս դեպքում՝ ԱՄՆ ղեկավարությունը, այդ միջազգային պայմանագրի մաս է, դա նշանակում է, որ ներկայությունը քաղաքական ակտ է եւ ոչ թե իրավական պարտավորություն։ Դա նշանակում է, որ վկան այդ համաձայնագրի կատարման երաշխավորը չէ։ Այսինքն՝ այն, ինչ տեղի ունեցավ Վաշինգտոնում, Թրամփի ու ԱՄՆ համար ընդամենը քաղաքական ակտ է, այսինքն՝ որեւէ իրավական հետեւանք չունի։
«Կրկնվում է 2018 թվականի իրավիճակը՝ ընտրություններից առաջ Ալիեւը Նիկոլին խոստացել է չկրակել, որպեսզի Նիկոլի լեզուն մի քիչ իր բնից դուրս գա, ընտրություններից առաջ ազգային ուժերին կամ նոր ընդդիմադիր ուժերին կարողանա շրջանցել այդ խաբեությամբ, եւ ընտրություններից հետո նորից Ալեիւն ասի՝ դե արի կատարի։ Դեժավյու է ինձ մոտ»,- նշեց նա։
Աշոտյանն ասաց, այս իրավիճակի համար մեղավոր է յուրաքանչյուրը, ով թեկուզ իր անտարբերությամբ նպաստել է այս ամենին, մեղավոր է ընդդիմությունը, որ իր թերի գործողություններով չի կարողացել վերջնական լուծում տալ այս ամենին։
Միաժամանակ՝ Աշոտյանն ասաց, որ Նիկոլ Փաշինյանը կարող է՝ վախի ազդեցության տակ է ստորագրել այդ պայմանագիրը, Փաշինյանը վախեր ունի Ալիեւից։ Պետությունը կարող է չեղարկել պայմանագիրը, եւ երաշխավորը՝ տվյալ դեպքում ԱՄՆ-ն, պարտավոր է այդ քաղաքական կամքը դրսեւորել, եթե պայմանագիրը ստորագրված է ուժի կիրառման սպառնալիքի տակ։ «Եվ դա ակնհայտ է, որովհետեւ Նիկոլի նախորդիվ տրված հարցազրույցներն այն մասին են, որ՝ Ադրբեջանը մեզ վրա ճնշում է գործադրում։ Այսինքն՝ ժողովուրդ ջան, եթե այսօր փոխենք Նիկոլին, մենք ամեն անգամ շանս ունենք կանխելու ավելի վատը եւ դզելու այն, ինչ ինքն արել է։ Ինչքան ուշ դա անենք, այնքան բաներ կան, որ անդառնալի են կամ ժամանակավրեպ»,- հավելեց Աշոտյանը։
Ռոզա ՀՈՎՀԱՆՆԻՍՅԱՆ
