-Այն փաստաթուղթը, այն պայմանավորվածությունը, որ արձանագրում է ՀՀ ինքնիշխանությունը, տարածքային ամբողջականությունը, իրավազորությունը, սահմանների անխախտելիությունը Սերժ Սարգսյանն անվանում է կապիտուլյացիա,- այսօր կառավարության նիստից հետո լրագրողների հետ ճեպազրույցում ասաց վարչապետ Նիկոլ Փաշինյանը՝ անդրադառնալով երրորդ նախագահ Սերժ Սարգսյանի հայտարարությանը, որ Վաշինգտոնյան փաստաթուղթը կապիտուլյանտի կողմից Ադրբեջանի պահանջների հերթական բավարարումն էր:
-Սրանով նա բացահայտում է, որ իր եւ ոչ միայն իր, ամբողջ գործունեությունն ուղղված է եղել եւ շարունակում է ուղղված լինել Հայաստանի ինքնիշխանության, տարածքային ամբողջականության, իրավազորության, սահմանների անխախտելիության դեմ: Այսինքն, դա շատ ցցուն եւ խոսուն ինքնախոստովանություն է,- շարունակեց Փաշինյանը:
Կարդացեք նաև
Անդրադառնալով քննադատություններին, թե ստորագրվածն ընդամենը հռչակագիր է ՝ Փաշինյանը նկատեց, որ դրանով ուզում են նսեմացնել հռչակագրի նշանակությունը. «Ասում են՝ ի՞նչ է, որ դա հռչակագիր է, իբր դրանով նսեմացնում են այդ փաստաթղթի նշանակությունը: Ես նորություն ունեմ ձեր համար: Ղարաբաղի հակամարտության բանակցված փաստաթուղթը հռչակագիր է եղել՝ Հայաստանի Հանրապետության և Ադրբեջանի Հանրապետության նախագահների հռչակագիր: Այսինքն, եթե հռչակագիրն այդպիսի վատ կարգավիճակ ունեցող փաստաթուղթ է, ուրեմն ինձնից նախորդները՝ 1994-ից մինչև 2018 թվականը, մեր բոլորի ռեսուրսները, ժամանակը, կյանքը մեր նահատակների կյանքը զոհաբերել են ինչ-որ ոչինչ չարժեցող մի թուղթ բանակցելու վրա: Թող ասեն՝ մենք որ հռչակագիր էինք բանակցում, մենք հասկանում էինք, որ դա ոչինչ չի նշանակում, թող խոստովանեն, որ խաբել են ժողովրդին»:
Արփինե ՍԻՄՈՆՅԱՆ
