Շենգավիթ վարչական շրջանի որոշ հատվածներում մարդիկ «պայքարում» են կանգառների ցուցանակների դեմ, դրանք հանում կամ տեղափոխում: Aravot.am-ի հետ զրույցում Կարինե անունով քաղաքացին հետեւյալը նշեց. «Կանգառի ցուցանակը Նորագավիթի 1-ին եւ 6-րդ փողոցների խաչմերուկում էր, քաղաքապետարանի աշխատակիցները դրանք տեղափոխեցին 20 մետր՝ պատճառաբանելով, թե խաչմերուկի մոտ կանգառ չպետք է լինի: Բայց նրանց տեղադրած ցուցանակն էլ տվյալ տարածքի բնակիչներն են հանել ու դեն շպրտել, որովհետեւ չեն ցանկանում, որ իրենց տների մոտ ավտոբուսների կանգառ լինի: Մեկ ուրիշն էլ կանգառի այդ ցուցանակը շուրջ 70 մետր է հեռացրել, լարերով կապել փողոցային լուսավորության սյանը: Արդյունքում, հիմա քաղաքապետարանի սահմանած կանգառի տարածքում կանգառ չկա, այն գտնվում է մոտ 70- 80 մետր հեռավորության վրա»:
Մի քաղաքացի էլ մեզ փոխանցեց, որ 3 ամիս առաջ կատարվածի մասին ահազանգել է քաղաքապետարանի թեժ գծին, սակայն խնդիրը լուծում չի ստացել. «Զանգել ենք, մեզ փոխանցել են տրանսպորտի վարչության՝ 011514125 հեռախոսահամարը, որտեղից էլ ասացին, թե Ոստիկանությունը զբաղվում է խնդրով, եւ շուտով կանգառի ցուցանակը կվերադարձվի նախկին տեղը: 3 ամիս է անցել, սակայն խնդիրը չի լուծվել, ցուցանակը կանգառից բավական հեռու է՝ լարերով ամրացված սյանը եւ դրան հաջորդող կանգառին բավական մոտ: Ու սա միակ դեպքը չէ: Նման դեպքերը մեզ մոտ ավելացել են, երբ քաղաքացին ինքնուրույն հանում եւ տեղափոխում է քաղաքապետարանի տեղադրած կանգառի ցուցանակը, սակայն քաղաքապետարանը հետամուտ չի լինում, որ այն վերադարձվի իր տեղը: Իսկ քաղաքապետարանի տրանսպորտի վարչության աշխատակիցը մուննաթ է գալիս, թե դա ինչ մի խնդիր է, որ զանգում ու դժգոհում եք»,-ասաց մեր զրուցակիցը:
Խնդրի վերաբերյալ Aravot.am-ին Երեւանի քաղաքապետարանից փոխանցեցին, որ տեղյակ են խնդրից, գրությամբ դիմել են վարչական շրջանին, որ կանգառը վերականգնվի այն տեղում, որտեղ սահմանված է եղել Երեւանի քաղաքապետի որոշմամբ: «Խաչմերուկից տեղափոխել էին, որովհետեւ վթարային վիճակ էր ստեղծում, բայց կվերադարձվի այնտեղ, որտեղ դրված է եղել եւ քաղաքացիներն անօրինական հանել են»,-պարզաբանեցին քաղաքապետարանից:
Գոհար ՀԱԿՈԲՅԱՆ
