Այսօր՝ օգոստոսի 28-ին կառավարության նիստից հետո լրագրողների հետ տեղի ունեցած ճեպազրույցում վարչապետը, ըստ իս, ստորացրեց կառավարության բոլոր անդամներին՝ ասելով, որ կառավարությունը ինքն է և ով իր տեսակետին հակառակ է՝ դուրս կշպրտվի կառավարությունից։
Իրականում այս հայտարարությունը շատ մտահոգիչ է ո՛չ միայն կառավարության անդամների համար, այլ պետական համակարգում աշխատող կամ ծառայող յուրաքանչյուր պաշտոնյայի համար։ Այդ մեկ հայտարարությունը իր մեջ պարունակում է բազմաթիվ թաքնված նմանատիպ մտահոգիչ հայտարարություններ, ինչպես օրինակ, «Գլխավոր դատախազը ես եմ․․․», «Քննչական կոմիտեի նախագահը ես եմ․․․», «ԱԱԾ տնօրենը ես եմ․․․», «ՆԳՆ նախարարը ես եմ․․․» և այդպես շարունակ, սակայն կա մի բան, որը չի կարող ասել և դա նրան շատ է անհանգստացնում, դա «Ամենայն Հայոց կաթողիկոսը ես եմ․․․» հայտարարությունն է, որը նույնիսկ թաքնված կերպով ոչ մի կերպով չի կարող տեղավորվել «կառավարությունը ես եմ․․․» – ի մեջ։
Ի պատասխան լրագրողների խելամիտ հարցերին, որով նրանք հնարավորություն տվեցին «կառավարությանը» գոնե ակնարկել Եկեղեցու նկատմամբ իր վերաբերմունքի փոփոխման մասին՝ հակաքրիստոսը հերթական անգամ Հայ Առաքելական Սուրբ Եկեղեցու մասին իր թշնամանքի մասին հիշեցրեց ու վիրավորեց միլիոնավոր հայորդիների կրոնական զգացումները՝ անհարգալից արտահայտվելով Ամենայն Հայոց հայրապետի ու հոգևորականների հասցեին։
Իհարկե, նա և իրեն համախոհ «Հայ Առաքելական Սուրբ եկեղեցու նախանձախնդիր հետևորդները» դա բացատրում են Եկեղեցին մաքրելու մտադրությամբ, սակայն նման կերպ մտածողները պետք է ականջներին օղ անեն մի պարզ ճշմարտություն, այն է, որ Եկեղեցին երբեք կեղտոտ չի լինում, որ մի հատ էլ մաքրելու անհրաժեշտություն ունենա։ Եկեղեցին կեղտոտվելու հատկություն չունի։ Եկեղեցին «մաքրելու» մասին մտածողները պետք է մաքրեն իրենց պղտոր մտքերը և ուղղեն իրենց սրտերը դեպի Ճշմարտությունը, որը Քրիստոս է։
Կարդացեք նաև
Երբ «կառավարությունը» սպառնում է Եկեղեցուն՝ պետք է հիշի նաև, որ Եկեղեցին վախենալու հատկություն նույնպես չունի։ Աստծու երկյուղը, որ կրում է Ամենայն Հայոց Հայրապետը և Նորին Սրբության առաջնորդությամբ յուրաքանչյուր հոգևորական իր սրտում ու մտքում, թույլ չի տալիս նրանց վախենալու որևէ մեկի հոխորտանքներից։
«Կառավարությունը» թող իմանա, որ Եկեղեցու ուղղությամբ իր նետած զենքը օգոստոսի 8-ին բումերանգ է դարձել և հետադարձի ճանապարհին է։ Անեծքի տակ են բոլոր նրանք, ում մտքով անգամ կանցնի երբևէ հարձակվել Քրիստոսահիմն Հայ Առաքելական Սուրբ Եկեղեցու վրա, մի՛ մոռացեք սրա մասին։ Այդ զենքի դեմ, որը հոգևորականի անեծքն է՝ ոչ մի հակաօդային պաշտպանություն գոյություն չունի։
Հետևաբար, մյուս անգամ պարոն «կառավարություն» երբ լրագրողները Ձեզ հնարավորություն կտան խոսելու զղջալու և ապաշխարելու մասին՝ մի՛ զլացեք և մի՛ ամաչեք, խոսեք բարությամբ ու խաղաղությամբ։ Ճիշտ է, կարծում եմ, Վեհափառ Հայրապետը ԱՄՆ նախագահի հեռախոսի համարը չունի, որ նրան զանգի ու պատմի Ձեր չարաճճիությունների մասին, բայց կապը Տիրոջ հետ ավելի զորավոր է՝ քան երկրի վրա ապրող որևէ մեկի հետ։
Գենադի ՄՆԱՑԱԿԱՆՅԱՆ
