«Ուշադիր քաղաքացիները կնկատեն, որ հաղորդագրությունն առաջինը տարածել է Երևանի քաղաքապետարանը, և խոսքը բացառապես վերաբերում է Երևանի դպրոցներին»,- ՀՀ ԱԺ Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նիստի ընթացքում պարզաբանեց ՀՀ ԿԳՄՍ նախարար Ժաննա Անդրեասյանը։
Նա ևս մեկ անգամ շեշտեց՝ երկուշաբթի օրվանից Երևանի դպրոցներում առաջին հերթի դասերը կսկսվեն ժամը 8։15․ «Չեմ կարծում՝ սա որևէ մեծ ու էական փոփոխություն է կրթական գործընթացի համար, բայց կարող է մեծ փոփոխություն բերել տրանսպորտային հոսքերի՝ ավելի արդյունավետ կառավարման համար և թույլ կտա խցանումների մեջ չընկնել դպրոց գնացող մեր երեխաներին»։
Ժաննա Անդրեասյանն ասաց, որ մարզերի դպրոցները մինչև այս էլ աշխատում էին այլ ռեժիմով, քան Երևանի դպրոցները․ «Եթե Երևանի դպրոցների դասերը ժամը 08։30 էին սկսվում, մարզերում աշխատում են՝ սկսած ժամը 09։00-ից։ Եվ դա բոլորովին պատահական չէ, քանի որ դեռևս տարիներ առաջ Երևանում տարբեր կրթական մակարդակի հաստատությունների համար տարբեր սկիզբ է սահմանվել՝ նպատակ ունենալով կառավարել տրանսպորտային հոսքերը։ Բուհերում դասերը հիմնականում 09։30 են սկսվում, որ նաև մարդիկ միաժամանակ տնից դուրս չգան և ունենան հնարավորություն ավելի հարմարավետ պայմաններում հասնել իրենց ուսումնական հաստատություն և աշխատավայր։ Բուհերն ավելի ուշ են սկսում կրթական գործընթացը, քանի որ բուհերում ունենք մարզերից երթևեկող ուսանողներ, որ լրացուցիչ անհարմարություններ չառաջացնենք այդ ուսանողների համար»։
Կարդացեք նաև
Ժաննա Անդրեասյանը, անդրադառնալով առաջին հերթի դասերի՝ 15 րոպե շուտ մեկնարկի հետ կապված քննարկումներին, ասաց․ «Բոլորովին օգտակար չէ, երբ երեխան դպրոցի ճանապարհին տևական ժամանակ անցկացնում է մեքենայում։ Այդ դեպքում դպրոց հասնելով ավելի մեծ խնդիրներ է ունենում կենտրոնացման և մյուս առումներով։ Նաև երեխայի շահերից է բխում, որ նա ավելի արագ հասնի դպրոց։ Մեր բոլոր ծնողները, որոնք մտահոգ են իրենց երեխայի կրթության որակով, հուսով եմ՝ կկարողանան մի փոքր ջանք դնել և իրենց համար էլ շատ ավելի դյուրին դարձնել հետո աշխատանքի գնալը առանց լրացուցիչ լարվածությունների»։
Տաթև ՀԱՐՈՒԹՅՈՒՆՅԱՆ
