«Մենք ունենք մեր հայացքները եւ եթե տեսնեինք քաղաքական դաշտում ուժ, որը կարտացոլեր մեր գաղափարները, հնարավոր է այդ ժամանակ նայեինք այդ ուժի ուղղությամբ։ Բայց մենք չենք տեսնում»,- այսօր կայացած ասուլիսում հայտարարեց «Մեր ձեւով» շարժման համակարգող Նարեկ Կարապետյանը՝ պատասխանելով հարցին՝ նոր ստեղծվելիք քաղաքական ուժ լինելու է նախկին քաղաքական դեմքերից բաղկացա՞ծ, բայց նոր փաթեթավորմամբ:
Նրա բնութագրմամբ, քաղաքական ուժերը մարդկանց կերակրում են քաղաքական մոտիվներով, իսկ դրա ազդեցությունը մարդկանց կյանքի վրա շատ քիչ է։ Իրենց օրակարգի շարժիչը տնտեսական քաղաքականությունն է լինելու։ Միաժամանակ, բանախոսն ասաց, որ տարբեր ոլորտներում լավ ղեկավարներ ենք ունեցել եւ նրանց ներուժն իրենք օգտագործելու են։ Նա մասնավորաբար մատնանշեց Հայաստանի տնտեսական զարգացման և ներդրումների նախկին նախարար Սուրեն Կարայանին՝ հավելելով, որ նրա պաշտոնավարման սկզբին ՀՀ-ի տնտեսական աճը 1 տոկոս է եղել, ավարտին՝ 7,5 տոկոս։
Հարցին՝ «Տաշիր» ընկերությունների սեփականատեր Սամվել Կարապետյանը ՌԴ քաղաքացի է եւ չի կարողանալու Հայաստանում կուսակցություն ղեկավարել, առաջադրվել պատգամավորի եւ վարչապետի թեկնածու, ի՞նչ կարգավիճակով է ղեկավարելու նոր ստեղծվելիք քաղաքական ուժը, Նարեկ Կարապետյանը պատասխանեց, Սամվել Կարապետյանը նաեւ ՀՀ քաղաքացի է, նաեւ իրենց գաղափարական առաջնորդն է, թիմն առաջնորդվելու է նրա գաղափարներով։
Հիշեցմանը, որ իր ասուլիսում Նիկոլ Փաշինյանը՝ խոսելով Սամվել Կարապետյանի քաղաքական գործունեության մասին, ասել էր՝ «ուզում է մարիոնետավա՞ր աշխատել», հակադարձեց․ «Մեր Սահմանադրությունը գրված է այնպես, որ ԱԺ-ն պետք է ընտրի, բայց հավասարակշռի վարչապետին, կառավարության անդամները կատարեն իրենց աշխատանքը․ ո՞նց եք կարծում, ԱԺ-ն այսօր հավասարակշռո՞ւմ է վարչապետին, արդյոք վարչապետի չի՞ կենտրոնացրել իր ձեռքում աշխատանքային եւ քաղաքական ուժը»։
Կարդացեք նաև
Նրա համոզմամբ, իշխանությունը չպիտի լինի այնպիսինը, որ մեկ անձի ձեռքում կենտրոնացած լինի եւ այդ անձի կամոք՝ տարբեր կատակլիզմների միջով անցկացնելով պետությունը՝ երկարացնի սեփական իշխանությունը։
Լրագրողների հարցերին՝ ո՞վ է ղեկավարելու ստեղծվելիք կուսակցությունը, ո՞վ է լինելու կուսակցության վարչապետի թեկնածուն՝ առաջիկա ընտրություններում, եթե չլինեին Սամվել Կարապետյանի վրա ճնշումները, նա քաղաքական ուժ կստեղծե՞ր, Նարեկ Կարապետյանն ընդհանրական պատասխաններ տվեց՝ հավելելով, որ տարեվերջին, երբ քաղաքական հայտ կներկայացնեն, բոլոր հարցերի պատասխանները շատ հստակ կհնչեն։
«Մեր երկրում քաղաքական կուսակցությունը պետք է հիմնված լինի գաղափարական հենքի վրա, գաղափարը կարող է լինել տնտեսությունը, սոցիալական փոփոխությունները։ Ինչ վերաբերվում է անհատներին, լինելու են, ղեկավարելու են պրոֆեսիոնալները։ Շատ կարեւոր է, որ ոչ մեկին շանս չտրվի այսպես կենտրոնացնել ամբողջ իշխանությունը եւ հայտարարել՝ «կառավարությունը ես եմ»։ Դա շատ կարեւոր է յուրաքանչյուր հաջորդ կառավարության համար, որովհետեւ իշխանությունը դեֆորմացնելու հատկություն ունի մարդկանց։ Մարդը կարող է մինչ իշխանություն գալը մի ծրագրի հավատալ եւ մի արժեք ունենալ, բայց վեց-յոթ տարվա ընթացքում կարող ես տեսնել, որ այդ մարդուց երեւի բան չի մնացել․ եւ գաղափարական առումով հարց է առաջանում՝ այդ մարդը հենց սկզբից էր այդպիսի՞ն, թե՞ ընթացքում դարձավ այդպես։ Այդ պատճառով ինստիտուցիոնալիզմը շատ կարեւոր է, հավասարակշռությունը շատ կարեւոր է, մեր քաղաքական հայացքները այդպիսին են, որպեսզի մենք էլ ու մյուս բոլոր ուժերն էլ չդառնան այն, ինչ հիմա մենք տեսնում ենք»։
Մանրամասները՝ տեսանյութում
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
